Maham ka CoRP ia ki Rangbah Shnong

Nongpoh, 08 Nailur:
Ka Confederation of Ri Bhoi People (CoRP) Sengkmie, ka la pynpaw ia ka jingsngewkhia halor ka jongdon jong ki katto katne ngut ki Rangbah shnong hapoh ka Distrik, kiba shim kabu da kaba shim ha ka dor kaba rem ia ki nongthied jaka bad ia ki briew kiba kwah ban rung shnong.
Katkum ka kyrwoh ba la phah da u Bah Karbius Lyngdoh, Publicity ka CoRP Sengkmie, la ong ba don ki rangbah shnong kiba dawa ia ka Shiphew Persen kum ka bai thoh ia ki kot ki sla jaka bad ha kajuh ka por ki dawa ruh ia ka ia ka bai rung shnong ha ka dor kaba rem.
La ong ruh ba ki don ki briew kiba don ia ka lad tang ban thied jaka bad shna iing, hynrei tang namar ka jingrem dor ka bai thoh bad ka bai rungshnong, kumta ki hap ban sangeh noh ia ka jingthied jaka bad rung shnong, ha kaba kane ka jingle da ki rangbah shnong ka long kumba khniot ia ki para Khasi Khara, la ka long ia u Khynriam, u Pnar, Bhoi bad War.
Kumta halor jong kane ka nongrim ka Seng ka la leit ruh ban iakynduh ia u Syiem Mylliem, ban pynpaw ia ka jingsngewkhia halor kane ka jingeh jong ki paidbah, hynrei la ong ruh ba katkum ka jingpynshai na u Syiem, ki Rangbah shnong kim lah ban shim bai thoh haduh 10 persen bad ka bai rung Shnong kaba rem.
Khadduh eh, ka seng ka pyntip sha baroh ki paidbah nongshong Shnong ka them Ri Bhoi, ba lada ki lap ba don kino kino ki Rangbah Shnong kiba shim ia ka bai thoh jaka 10 persen bad ka bai rung shnong kaba rem, ki dei ban pyntip sha ka Seng lyngba ka jingthoh bad ban batai shai ruh ia ki Rangbah Shnong kiba leh ia katei ka kam beain, pynkut ka kyrwoh.