Maham ia ki Khasi ba die Challan sha ki bar jylla

Shillong: U Joint Secretary ka Meghalaya Limestone, Boulder stone and Coal Miner Cum Exporter Forum u K W Nongrum myn hynnin ka sngi u la maham tyngeh ia ki Khasi ba die ia ki ‘Challan’ sha ki bar jylla na ka bynta ban shalan ia ki mar khyndew na ka jylla sha ka ri Bangladesh.

U Bah K W Nongrum haba kren bad ki lad pathai khubor ha Sohra u la ong ba ka jing die ki Khasi ia ki ‘Challan’ sha ki bar jylla ka la pynlong ia ki bar jylla ban knieh lut ia ka khaii pateng ha ka thain Ichamati, Majai bad kiwei pat ki shnong mar khap. U la iathuh ruh ba mynta ki bar jylla namar ba ki la sngew shngain palat ki la sdang ruh ban kam trai ia ki jaka ki puta ha kane ka thain bad ki la pynkylla kyrteng wat ia ka ‘Majai’ sha ka ‘Bholaganj’.

“Ka daw ban pynlong ia ki bar jylla ban jyllei ha ka jing khaii jong ki ha ki shnong markhap bad ka ri Bangladesh kadei ba ki ioh suk ia ki ‘Challan’ ban shallan mar khyndew bad ka jing suk jong ki ban ioh ia ki NOC na ki Khasi kiba dei shnong trai na kane ka thain” u la bynrap.

U K W Nongrum u la kyntu ia ki paidbah jong ka thain ba kim dei shuh ban ai NOC ne ban die ‘Challan’ sha ki bar jylla bad u la kyntu ruh sha ki bor sorkar khamtam ka KHADC, ki Syiem Hima lem bad ki nong shynshar shnong ba ki dei ban weng (Cancel) noh ia ki NOC bad ia ki ‘trading license’ ba la dep ai sha ki bar jylla.
Na ka liang u K W Nongrum u la kyntu ruh sha ka KHADC ba kadei ban pynshitom tyngeh ia ki Khasi katkum ki kyndon jong ka ‘Benami Act’ ki ba leh ‘Benami’ ia ka hyndew ka shyiap hapoh u pud u sam jong ka jylla Meghalaya.