Lynthaw ki Taliban, ia ki bitor wain jong ka Norway bad tar lyngkhot ia ki kot pule

Ki ehrang Taliban, ki la kurup noh mynta ka sngi, ia iing jong ka sorkar Norway, kaba don ha Kabul.

Mar ia ioh rung ha katei ka iing sorkar, ki ehrang Taliban, kiba kieng atiar bha, ki la lynthaw bad pyn julor lut khait ia ki bitor wain bad nangta ia ki kot pule kiba don ha katei ka iing sorkar.

U nongmihkhmat ka Sorkar Norway, uba don ha Iran, U Sigvald Hauge, u thoh ha ka tweet jongu, da kaba ong “Ki Taliban, ki la kurup ia ka iing jong ka sorkar Norway ha Kabul bad ki ong, ba kin sa pynphai pat sha ngi kham hadien. Hynrei ka kam kaba nyngkong eh jongki, ka long, ha kaba ki la lynthaw lut ia ki bitor wain bad ki la tar lut khait ia ki kot pule jong ki khynnah. Ki suloi ki kham duna na ka jingma” ula ong.

Kham mynshwa ki Taliban, ki ong ba kin nym pynthut satia ia ki ophis jong ki Ri bapher, kiba don ha ka nongbah Kabul.