Guwahati: Ka ophis jong ka seng Asom Gana Parishad (AGP), kaba ia treilang bad ka BJP ha Assam, ka la shah hiar thma mynta ka sngi, ha kito kiba pyrshah ia ka jing pyntrei kam ia ka ain CAB.
Katei ka jingjia, ka la jia ha Dibrugarh bad nangta sa ki nong pyrshah CAB, ki la leit tur bad ia halla ha ka iing sah jong U Atul Bora, ha Golaghat, kaba don ha Upper Assam mynta ka sngi hi.
Ki don da ki spah ngut kiba la leit tur sha ka ophis jong ka seng AGP bad kitei ki la lynthaw ia ki tiar ki tar bad ki jingdon jingem jong katei ka ophis kaba ha Dibrugarh.
La iathuh ba ki dkhot jong ka seng Chatra Mukti Sangram Samiti (CMSS), ki leit tur bad halla ha ka iing sah jong U Atul Bora, ha kaba ki la ia halla kyrkait pyrshah ia utei u nongialam, uba dei ruh u myntri ka tnat rep jong ka sorkar Assam. U myntri, u don ha ka iing sah jongu, ha ka por ba ka don ka jingleit tur jong kitei ki kynhun, ong ka khubor.
Ki nongiakhih CAB, ki la leit tur ruh hynnin ka sngi, ha ka iing sah jong U MLA ka BJP ha Dibrugarh, U Prasanta Phukan, ha kaba ki la ia halla bad pyrta pyrshah ia ka CAB,ong ka khubor.
Phi don ban ong eiei?