Lynthaw ia ki radio, ba um kren U Modi, ia ka jinglong ha Manipur

Imphal:Ki paidbah jong ka jylla Manipur, ki la pynpaw ia ka jing pyrshah bad bitar ia ka jing sngap kuman jong u Myntri Rang bah duh ka ri u Narendra Modi, haba iadei bad ka jing ia umsnam ba la pluh ha ka jylla jong ka thaiñ shatei lammihngi.

Ha ka sngi u Blei, ka 18 tarik Jylliew, ki paidbah ha ki bynta bapher bapher jong ka jylla Manipur ki la lympat ia ki transistor, katba ka jingkren jong u Myntri Rangbah duh ka ri kaba la tip kum ka prokram Maan ki Baat ka dang iaid.
Kane ka jing lympat jong ki paidbah ia ki transistor ha ka prokram Maan Ki Baat radio ba shisien shitaiew jong u Myntri Rangbah Duh jong ka ri, ban pynpaw ka jing pyrshah ia ka jing sngap jar jong u Narendra Modi haba iadei bad ka jing-iaumsnam ha jylla Manipur.

Ki nong iakhih pyrshah ki la pyrta ia ki slogan, pyrshah ia u myntri rangbah duh jong ka ri bad ia ka sorkar manipur kum ka jing pyrshah halor kane ka jing ia umsnam ba dang shu jia.
Ha ka jingkren lyngba ka Maan ki Baat u Modi u khlem pynmih satia tang shi kyntien ruh ia ka jingjia ha jylla Manipur.
Na ka liang jong u president jong ka parti Congress u Mallikarju Kharge u la kynthoh ia u myntri rangbah duh jong ka ri haba iadei bad ka jingsngap jar jong ban kren ia ka jing ia umsnam ha jylla Manipur.
Na ka liang u Kharge u la ong ba u ka prokram jong u Myntri Rangbah duh ka Maan ki Baat ka dei ban kynthup ia ka Manipur ki baat, namar ba ka jing jia ha katei ka jylla ka pyntieng pynsyier.

U President jong ka Congress, u la ong ruh ba u Modi u khlem kren tang shilyntien ruh,u khlem khot ia ka jingialang jong baroh ki parti saiñhima sima bad tang kawei ka jingialang ruh.
Ka sorkar pdeng ha ka jingialam u Modi ka dang ioh thiah katba ka jylla Manipur pat ka la ingkhong.
Ka sorkar jong u Modi imat ka khlem kheiñ satia ba ka jylla Manipur kum ka jaka ba hap ha ki bynta jong ka ri india bad kane ka dei ka bymlah satia ban pdiang.

U Myntri Rangbah duh u kam ia ka jinglah jong ka ri india ban tehlakam ia ki jinglynshop jong ki bor mariang, balei pat ia ka jingiakulmar ha jylla Manipur ka ba dei ka jingleh jong u briew,la ong u Ramesh
Kam don satia ka jing kyrpad na u myntri rangbah duh, kam don satia ka audit ia ka mang tyngka ne ka PM fund, hato u Myntri Rangbah duh jong ka ri, u sngewkhia ia ka jylla Manipur.

Ka jylla Manipur naduh ka 3 tarik jymmang ka la sdang ka jing kulmar bad huri hura pher jaitbynriew ba shyrkhei, kaba la shim ia ka jingim jong palat 100 ngut ki briew bad kaba la pyn sakma ia ki hajar ngut kiwei pat, kane ka jing iaumsnam pher jaitbynriew ka la neh ruh la palat 45 sngi.