Lynshop ka jingduhnong, ia ki nongrep ha Weikyian, ba hiar dor palat u synsar

Shillong:Ka jinghiar dor u synsar ha kine ki sngi, ka la lynshop jubor bad pynmih ia ka jingdiaw mynsiem kaba jur ia ki 80 tylli ki longing, ha ka shnong Weikyian, kaba hap ha ka Elaka Nongjri, kaba don harum jong ka shnong Pynursla bad kaba dei kawei na ki shnong kiba shaniah ia ka jingim jongki, tang ha ka rep synsar.

Ha ka jingiakren jong U Rupang bad ki nongshong shnong jong katei ka shnong, ki iathuh, ba ka dor jong u synsar, ha kane ka snem, ka la hiar palat liam bad kaba long tang hapdeng ka T.4 haduh T.5hajar shi kwintal bad kane ka dor kam iahap eiei ruh em, na kaba long ha ki ar snem ba ladep, ha kaba ka dor jong u synsar, ka long hapdeng jong ka T.10 haduh T.13 hajar shi kwintal bad katei ka jinghiar palat jong ka dor, ka la buh jingeh ia ki nongrep jong katei ka shnong, namar ba ki pynlut por ialade baroh shisnem, naduh kaba pynkhuid, haduh kaba sumar ia ka bri synsar, nangta, sa kaba leit pom bad ka thad bad ka kit bad ka bailut, na ka bynta shi kwintal, la antad, ba kan poi sha ka T.6 lane T.7 hajar ha ka shi kwintal bad kumta kawei pa kawei ka iing, ha katei ka shnong, ka don ha ka jingduhnong, ha kaba katba nang bun synsar, ka jingduh, ka nang jubor lane ka jingbamram na ki dukan, ka jingpynlut ha ka bai bylla bad kiwei, ka la pynkylla ia kitei ki nongrep synsar, ba kin poi ha kine ki sngi, sha ka jingduk tasam.

Ha ka jingiakren bad une u nongthoh khubor, ha ki khyndiat sngi ba ladep, ki rangbah bad ki longkmie ki la pynpaw ba kin sa mad, ia ka jingkyrduh kaba khraw bha mynta u snem lada u Synsar hi um kiew dor bad ki la pynpaw ruh ba ha katei ka shnong ka jongki kam don shuh da kumwei pat ka lad kamai lait noh tangna u Synsar bad ka Sla Tyrpad ki ba long ki wei ki kamai ba kyrshan ia ka jingduk ha man baroh ki thliew ing, ki la pynpaw ruh ba dei lyngba u synsar ki sa ioh ban thied khaw, ban pynleit skul khun, ban thied jingdonkam ha la ka jong ka ing, bad dei tang ka kamai kaba ki ioh na u synsar kaba lah ban kynshan haba iadei bad ka lut ka sep na bynta ka jingdonkam lada wan ka jingkordit bad jingshitom bad kumta, ki da kyrpad ia une u nongthoh khubor, ban pynsngewlem ha ka sorkar kaba dei peit ia ka kamai kajih, ka iohnong ka duhnong jongki nongrep riewlum ba kan phai lem sha ki ba kin iarap wad ka lad ka lynti ban pynkiew lem ia ka dor u synsar.