Lynshop ka eriong sha thain Wahkdait

Shillong, 13 Iaiong:
Hynnin ka miet, ka la don ka jingkhie eriong, kaba jur bha ha ka thain mihngi jong ka Riwar Mihngi, kaba la wan ryngkat bad ka jinghap slap kaba jur, u phria bad ka lyer kaba la paswut lut ia ki iing ki sem, kaba la ktah naduh jubor na Mawshun bad kham shathie sharum jong ka surok sha Dawki.
La ioh khubor, ba ki don da ki hajar tylli ki dieng kwai, kiba la khyllem, na ka jing lynshop jubor ka eriong, kaba la sdang naduh ka por 10.30 mynhynnin ka miet.
Ki shnong, kiba la shah ktah jur, ki long ka Wahkdait, ha kaba U Rangbah Shnong, Bah We Talang, u iathuh ba ula ioh jingtip, ba ki don da ki spah tynrai, ki dieng kwai, kiba la shah lympat ha ka eriong. Ym tang katta, ki don sa ki sainar ilektrik, ki nar ilektrik, kiba la shah syngngeit jubor ha katei ka jingkhie eriong hynnin ka miet.
U Sordar ka Raid Mawshun, U bah Joy Khongmawloh, u iathuh ba ha Lapalang, Nongthymmai, ki don da ki hajar tynrai ki dieng kwai kiba la khyllem. Ym tang katta, sa kiwei de ki jingthung, kum ka sla tyrpad, ki la shah jynrat tyngeh, na ka daw jong katei ka jingkhie eriong kaba jur hynnin ka miet. Ym tang katta, u iathuh ba ki don ki iing ruh, kiba shah lied malu mala, ha ki shnong, kiba hap ha ka Raid Mawshun.