Lynshop ka eriong ha ka thaiñ khappud EJH, julor ki ïing briew bad ki jaka rep

Ka eriong kaba jur bha myn ha ka sngi u Blei ha ka por kumba 3:30 baje eiei nohphai sngi, ka la lyngshop ïa ki shnong khappud jong ka East Jaiñtia Hills District kiba don ha khappud bad ka ri Bangladesh. Kine shnong shnong kiba la shah lynshop ha ka eriong erngit ki kynthup ïa ka shnong Umkiang, ka shnong Kuliang, ka shnong Prytakuna bad kiwei kiwei. Ka eriong kaba jur bha la wanrah ryngkat bad u phria, ka la pynjulor bun tylli ki iing briew bad kumjuh ïa ki mar rep ha ki Bri jong Tympew, Bri Soh, Bri Kwai ki paidbah jong kitei ki shnong.

U Ma Pardonwell Lyngdoh,u Rangbah Shnong ka Umkiang haba ïakren, u la ïathuh ba bun tylli ki iing ki sem jong ki paidbah nongshong shnong ki la shah pynjulor ha ka eriong bad ha u phria. U la ïathuh ruh ba ki dang don tang arngut ki nongshong shnong kiba dang wan pyntip ïa kane ka jingshah pynjulor sha u Rangbah Shnong, kata, ka longiing jong ka Kong Kynjai Rymbai bad ka iing jong u Ma Pre Surong kiba la shah lied lut ki tnum iing ha ka ‘eriong. U la ïathuh ruh ba bun ki Bri rep kwai, Bri tympew bad ki Bri soh ki la julor lut na ka jinglynshop jong kane ka eriong kaba jur bad u phria kat haduh ba ka la wanrah ïa ka jingduhnong kaba jur bha ïa ki nongrep. Kane ka dei ka por ba phuh syntiew bha u Kwai bad kiwei kiwei de ki kait soh, kum u Soh Manir, Sohpieng, Soh Phan Dieng, Soh Priem bad khamtam ruh ia u Tympew ba dang don sha khlaw halor Dieng. Hato ka don mo ka lad ia ka tnat ki nong rep ban ioh jing iarap na ka Sorkar Jylla?

Wanlem Langchiang