Lynniar ki Nongrep Sying ha Ri Bhoi ba shah khniot lyngba ka ot-kilo

Nongpoh: Ka jingshimkabu palat da ki nongthied Sying, kiba la ot kilo ia ki Sying na ki nongrep Sying, kiba la leit ban die ha ki Iew ki Hat, ka la pynlong ia kiba bun ki nongrep Syiem ha Ri Bhoi, ba kin iam lynniar, namar ba ki la duhnong palat na katei ka jingshim kabu da ki nongthied kitei ki nongthied Sying.
Ki la don ki katto katne ngut, ki nongrep Sying ha Ri Bhoi, kiba la pynpaw ia ka jingsngewkhia halor katei ka jing ot-kilo, da kitei ki nongthied Sying, ka la pynlong ia ki ba kin mad ia ka jingduhnong kaba khraw.
Ha ka sur jong baroh ki nongrep rep Sying ha Ri Bhoi, kitei ki nongrep ki la iathuh, ba ka jingot kilo ka la long shaba palat pud, namar lada 10 kilo u Sying la ot 1 kilo, lada 17 kilo la ot noh 2 kilo bad lada 100 kilo la ot haduh 10 kilo, ha kaba kane ka la pynsngew sih shikatdei eh ia ki nongrep Sying, namar ka jingshah ot kilo.
U wei na ki nongrep Sying, u bym shem la kwah pynpaw kyrteng ialade, u la ong, ba kane ka jingot kilo da ki nongthied, ka la pynduhnong shikatdei eh ia ki, namar ia kaei kaba ki iohnong na kaba ki rep, la shah tuh noh ha kitei ki nongthied, lyngba ka jingot kilo jong ki ia u Sying.
“Kumba ka long mynta lei, ka dor Sying ka heh bha namar u Sying u la poi haduh T. 100 shi kilo, kumta haba u nongrep u leit ban die 1000 kilo, hynrei u shah ot noh haduh 100 kilo, kaba mut ba u nongrep Sying u la duhnong haduh T. 10 hajar tyngka bad kane hi ka dei ka daw bah kaba ki nongrep Sying ki iakynduh mawsiang na ka jingshah khniot ha ki nongthied” ong utei u nongrep Sying.
Haba ngi iohi ba ki nongrep ha Nongbah Shillong, ki iakhih na ka bynta ban dawa wengnoh ia ka jingshah ot kilo, ngi ruh kum ki nongrep Sying ha Ri Bhoi, ngi kwah eh ban pynpaw paidbah halor kane ka jingshah khniot bein ha ki nongtheid Sying, namar ngi la shah lehbien shaba palat pud lyngba ka jingot kilo ka jong ki ia u Sying uba ngi leit ban die sha Iew sha Hat, pynpaw utei u Nongrep Sying.
Haba iadei bad kane ka jingshah nion bein ki nongrep Sying, ha ki nongthied, na ka liang ka FKJGP ha Ri Bhoi, lyngba u Bah Luistar, u la ong ba ka seng ka pynrem jur halor katei ka jingshah lehbein ki nongrep Sying, ha kaba ka la maham ruh ia ki nongthied Sying ha kylleng ki jaka ha Ri Bhoi, ba kim dei ban ot kilo palat pud na ki nongrep Sying, kiba la leit ban die Sying ha ki Iew kiba don ha Ri Bhoi.
Namarkata, ka seng hadien kane ka jingpyntip paidbah, ka la maham tyngeh ia kitei ki nongthied, da kaba byrngem ruh ba kan sa shim da ka sienjam kaba tyngeh, lada kitei ki nongthied Sying, kim sngap bad kin bteng ia ka jingnion ia ki nongrep Sying.