Lynniar ki nongrep ha Sohkhwai, ba hiar palat ka dor u synsar

Nongpoh:Ki nongrep na ka shnong Sohkhwai, kaba dei kawei na ki shnong ha Ri Bhoi kaba bun na ki briew ki dei ki nongrep, ki la pynpaw ia ka jingsngewsih kaba jur eh bad kata ka dei hadien ba ki mad ia ka jinghiar dor kaba palat liam jong ki mar rep mar riang.

Ha kane ka snem kaba mynta, kaba la pynkthang eh ia ki nongrep na katei ka shnong, ka dei halor ka jinghiar dor palat u Synsar bad kaba ki nongrep kim don shuh kata ka jingiohnong, lada khein halor ka jinglut jingsep bad ka bainong ia ki nongrep.
U Bah Diang Namsaw, u la ong ba kane ka jinghiar dor palat u Synsar ka la ktah shisha ia ki nongrep ha katei ka thain bad khamtam ba bun na ki longing na katei ka thain, ki dei kiba pynbiang ia baroh ki jingdonkam ha iing ha sem tang na ka pisa kaba ki ioh haba ki la leit ban die sha iew sha hat ia ki mar ba ki rep ki riang.

“Ha kaba kum kane lei ka por, ngi shanniah beit na ka pisa kaba mih na kaba die ia u Synsar, haba ngi donkam ban siew bai skul, thied kot skul ia ki khun ki kti lem bad kiwei pat ki jingdonkam ha ki iing ki sem, hynrei ha kane ka jinghiar dor kaba palat u Synsar mynta u snem, ka la buh jingeh ia ki briew ha katei ka thain” ong u Bah Diang Namsaw.

Kum uwei na ki nongrep, nga sngewdei ban kyrpad ia ka sorkar ba ka dei ban pyrkhat lem ban kham kyntiew noh ia ka dor u Synsar, namar lada ka long ha kane ka rukom jong ka jinghiar dor u Synsar, ka pynkynduh mawsiang ia kiba bun ngut ki nongrep.
Namarkata, na ka liang utei u nongrep u la kyntu ruh ia ki nongmihkhmat ba kin kren lem sha ka sorkar halor ka jinghiar dor palat ki mar rep mar riang, ha kaba kat kaba ki nongrep na katei ka thain ki ju rep, la ka long naduh ki soh Niamtra, u Synsar bad Lakait, ki nongrep ki la ju die beit sha ki Iew ki Har ha ka dor kaba tad eh.