Lynngoh ka CSWO ba sahteng ka kam u Fullmoon

Shillong, 14 Rymphang:
Ka CSWO ka la pynpaw ia ka jingsngew lyngngoh ia ka jingsahteng ka mukotduma kaba iadei bad ka jingshah siat iap u Fullmoon Dhar,uwei na ki snar dakaid ha u snem 2009 ha ki pulit ka Jowai.
Ka President ka CSWO ka Kong Agnes Kharshiing ka la ong ba ka la ujor ejahar pyrshah ia ki pulit ka Jowai ha u Jylliew 2009 halor ka jingpyniap ia u Fullmoon Dhar, halor ka jingkynnoh ba la shu siat iap ia u, hadien ba la ioh kem suk.
Ar ngut ki IO (Investigation Officer) u G U Wahlang uba long u CI ka Khliehriat bad u Inspector u D H Pde ha katei ka por, ki dei ba la bynshet ban pynlong ia ka jingtohkit hynrei kila pynkut da ka FR (Final Form) da kaba ong ba kam don ka sakhi ban kynnoh ba ki pulit ka Jowai ki la leh eiei kaba bakla.
“Nga la ujor baroh ar sien bad kyrpad ia u CJM ha Jowai ha katei ka por ban aiti ia ka jingtohkit ha ka CBI lano ha kano kano ka kynhun ba laitluid ban pynlong ia ka jingtohkit”, la ong ka Kong Agnes.
U CJM u la bynshet ha u SP ka West Jaintia Hills hynrei u SP ha katei ka por u Bah Hubert Lyngdoh ym shym la leh eiei, la kynnoh ka Kong Agnes bad bynrap haba la wan da uwei u SP, ka la pyntip halor kane katkum ka hukum na Kashari bad la bthah ia u Inspector ban shim ia ka jingkren jongka, kaba la ai katkum ka jinglap. Ka la ong ba bunsien ki pulit ka Jowai kim ju pyndep ia ka jingbthah na ka Kashari bad ka la thoh sha u DC barim ka Jowai uba long ha katei ka por halor kane ka jingbym kitkhia ki pulit ia ka kam.
“Kum kane ka jia man ki mukotduma ha kaba ki pulit ki leh bakla bad ki briew kim tip”, ka la ong bad bynrap ba dei ban sei bad pyndep ia ki jingshisha halor kane ka kam.