Lynguh hi pum ka jingiakawang ktieh ha Sohiong Constituency

Babu Kular Khongjirem

Ka Election ba dang sahteng na Sohiong Assembly Constituency ba la pynsahngeh noh na ka daw jong ka jingkhlad noh u candidate ba la dep thep kyrteng na ka UDP na katei ka konstituensi,I Bah (L)HDR Lyngdoh kan long shen ha ka 10th May 2023 bad ka jingianiew ia ki vote pat yn pynbna ha ka 13th May 2023. Ka jingiakawang ktieh jong ki party bapher bapher naduh kito ki por bad khamtam eh ha kane ka elekshon kaban sa long shen ka la shongshit bad iynnad bha.

Ka jingiakawang ktieh kalong khamtam eh tang para party ba ia synrop ne iatrei lang haka sorkar MDA-2 ba la lamkhmat da ka party NPP. Ki nongialam ka NPP ki la kop ia ki nongialam ka UDP ba,hana, ki khang horkit hordang ia ki paidbah ban leit kyrshan ne thep vote sha ka NPP katba ia lade pat(UDP_MLAs) ki bang bad sngewtynnad bha khop khop ban ia kup lang ha kajuh ka nep syiad jong ka NPP ha ing paki-dulan jong ka Secretariat.. Ym tang katta,hynrei ki NPP ki la kren jem daw ruh ia ka UDP ba,lada ka dei shisha ka party ki ‘riew shynrang ba shisha, ka dei ban mih noh na ka sem MDA-2 khlem pynslem shuh namar ba ki la biang briew hi ha ka sem MDA 2.Lada kim nud ban mih pat,ki dei shisha tang ki khawpud bad ki khwan myntoi tang ban ioh rieh tngen bad ioh jingmyntoi na ka shuki(position) jong ka sorkar MDA-2.

Ha ka jingshisha,kat kata ka jingkren jem daw bad jingkren pynjah burom,ka kham bha bad kham don burom shibun ban mih hi noh ban ia kaba shah beh noh la kum ki miaw ki ksew pynban.La kylla tad dor syndon ka longbriew manbriew hakhmat ki paidbah ba bun.La i tad dor ruh ka synshar ka khadar ha ka jylla jongngi mynta.Haduh katno eh ka syiad bad ka bang ka thiang eh ka shuki sorkar kat haduh bym tip ne sngewthuh shuh ia ka jah burom ka khein burom. Ki paidbah nongthep vote ha Sohiong ruh ki la kdang bad ngiah hi shoin ban sngap ia ki nia elekshon jong ki party bapher bapher.Ki kular ban ai lut ia ka bneng bad ka khyndew shwa ban thep vote.

Kijuh hi ki briew kiba pynbang pynthiang ha ka bye eleshon ha Mawryngkneng bad Mawphlang ha kito ki snem.Ynda ki la jop pat,u MLA na Mawphlang um treh ialeh elekshon shuh katba u MLA na Mawryngkneng pat u rem jah burom syndon ha u candidate ka VPP khlem poi pyrkhat satia.Kaba ima mynta kalong ba ioh jop pynban u candidate ubym poi pyrkhat na Sohiong Constituency namar ka ktien ka ju ong,’ Ha ka jingiakajia – majia(jingiakhun),uba bamsuk(uban jop) dei u poiei.Nang iakhun u khla bad u sing,nang ioh ei pynban u myrsiang ia ka thong.Yn sa ia peit ia ka rai bastad jong ki paidbah nongthep vote ka Sohiong iano kin pynjop ha ka sngi 10th May 2023 kaba dei ka sngi thep vote ban jied ia u MLA jongki.