Lyngngoh ki nonghikai ia ka jingkren u Dr RC Laloo

Shillong, 31 Lber:
Ki nonghikai JACATAM ki la pynpaw ia ka jingsngew lyngngoh ia ka jingkren jong u Dr RC Laloo halor ka Education Policy ka jylla.
Ha kane ka dorbar ba dang shu kut shen, u Dr Laloo u la ong ba ka sorkar kam shym la ioh pdiang eiei ka jingai jingmut na ki paidbah halor ka Education Policy haduh mynta.
Hynrei haba iakren hynne bad ki nongthoh khubor u chairman ka JACATAM u Bah ED Nongsiang u la ong ba ki nonghikai ki sngew lyngngoh ban iohi ia ka jingkren jong u Symbud Myntri Rangbah u Dr RC Laloo, namar ba ki nonghikai ki la dep iakren bunsien bad la ai jingmut ruh sha ka sorkar halor ka jingdonkam ban don noh ka Education Policy ha ka jylla.
“Man ba ngi iakren ia kane ka Policy, ka sorkar ka la ong ba ka la pynkhreh shaid shaid”, la ong u Bah Nongsiang hynrei lyngngoh ban iohi ba u Symbud Myntri Rangbah un kren pynban kumto kumba la paw ha ki lad pathai khubor.