Lyngngoh ka Kur Wahlang, ba shu jah rngai ka jingjurip u bah Shylla

Shillong: Ka synjuk Kur Wahlang Pahsyntiew phra kpoh ka sngew lyngngoh ba wat hadien u Chief Executive Member ka KHADC, Bah Hispreaching Son Shylla ula bthah ia u Syiem Jirang ban pynlong ia ka dorbar hima ba kyrkieh hapoh shitew, kata naduh 6 tarik Rymphang hynrei u Syiem um shym la khot dorbar haduh mynta bad ka la pynsuba jur ba ka lah ban don eiei sha lyndet hapdeng ka KHADC bad u Syiem.

U Bah HS Shylla ula leit jurip ha ka 6 tarik mynta u bnai ia ka thain Rani Jirang bad ula lap ba u Syiem bad ki myntri ki ai pata bad NoC ia ki bar jylla ban tih maw, khyndew kaba la shyrkhei ban pynjot bad julor ia ka mariang ha Rani Jirang khappud bad ka Assam, kumta ula btah ia u syiem ban khot ia ka dorbar hima hapoh shitew.
Na ka liang ka synjuk kur Wahlang Pahsyntiew phra kpoh ha ka kyrwoh ba la pynlait da u bah Shemphang Wahlang, ka kyntu ia ka District Council ban shim khia ban pynbeit noh ioh kan duh ki jaka.
Ka kur ka la ong ba ha ka por ba wan jurip u CEM, ki la kynnoh ba ki myntri ha jaka ban synshar ia ka iap ka im ka hima, ki lap miet pynban ba ai pata bad NOC ban khaïi ialade ryngkat ki nongtrei ba ha syndah bad jan baroh ki dkhot ka longiing jong ki wat ki khunlung bym pat tip eiei ki la ioh pata par maw ban tih bad die sha Assam.
Ka dorbar hima Jirang ha u snem 2007, ka la rai horkit hordang ba ym bit ban ai pata ne NoC ha ki jaka bym don jingthung jingtep bad ia kito ki jaka ba la ai iwei ar ruh dei ban weng noh bad la san snem mynta u Syiem u khlem pynlong dorbar hima.
Katkum ka riti dustur ka hima jirang ba lada u syiem um lah ban lum dorbar wat hapoh shisnem khlem ki nongrim ba biang dei ban sloit na ka khet syiem, hynrei ki nongialam ka KHADC naduh u CEM barim u Bah PN Syiem ki leh mynthi ia ka jingud ki khun ki hajar ka hima kiba mad ia ka jingeh.
Da ki hajar ki bar jylla ki kjit ia ka spah ka phew na hima jirang lyngba ka ophis jong u Syiem, hynrei u Syiem u dang nud ban pynpaw ba na bynta ka jingbit jingbiang ka hima ka ophis ka la leh khnang ban ai pata bad NoC ia ki bar jylla ban pynneh ia u pud u sam haduh ba ki lum ki kylla madan ha ki mawpud par maw bad kroshar ban bam duh ia ka khyndew ka shyiap.
Kum ban shu pynpaw ka synjuk Kur Wahlang Pahsyntiew phra kpoh hapoh ka jingialam u bah S Wahlang Secretary ka la leit ia kynduh ia u CEM KHADC ha ka 30 tarik Kyllalyngkot ryngkat ka jingdonlang u bah Latiplang Kharkongor EM Elaka bad da ka jingsngewkhia u bah Shylla buh sngi ban leit jurip mardor.
Kumba lah ban sngewthuh katei ka kam kam poi shano shano bad ka long pynban kum ban pynheh pla iano re iano bad ka la sah teng la palat ar snem naduh ba la ujor da ka Join Action Committee Hima Jirang ha u snem 2016.
Ka District Council ka kam ban pynneh ia ka khyndew ka shyiap katba ha Jirang ka leh mynthi bad kam ioh sngew ia ka jingud ki paidbah halor ka jingleh u syiem ban pynkhein ia ka riti dustur.