Lyngkot ki sngi long dorbar, ong ka liangpyrshah

Shillong, 21 Naiwieng:
Ki MLA ka liang pyrshah ka Meghalaya People’s Forum (MPF) kim iahap ia ka jinglyng kot palat ki sngi long dorbar tlang namar kin duh ban iakren ia ki mat kiba bun kiba donkam ia ka jylla.
“La don ka jing sngew na ki dkhot ka liangpyrshah ba kane ka dorbar tlang kaba mynta ka long kaba lyngkot palat tang hynriew sngi”, la ong u MLA ka National People’s Party (NPP) u James K Sangma haba rah ia kane ka mat hapoh ka iing dorbar mynta ka sngi sdang.
Katkum ka jingong jong u Sangma, la don shibun ki mat ba donkam ban iakren hapoh ka iing dorbar. “Halor kane, nga kyrpad ia phi Lamphang ban pynjlan ia ka por shong dorbar na ka 2.30 baje shaduh ka 4 baje man ka sngi”, la ong u Sangma.
Hynrei na ka liang u Lamphang u AT Mondal u la ong ba un peit ia kane ka jingpynsngew jong u dkhot ka iing dorbar.
Kumjuh ruh u MLA ka Garo National Council (GNC) u Clifford R Marak u la kyrshan ia kane ka jingdawa u James K Sangma namar ba ka sngi shong dorbar ka la long kaba lyngkot palat ha kaba ym ioh ban iakren bha bad ban rah ia ki mat ba bun kiba iadei bad ka jylla.
U Marak u la ong ba tang ar sngi la ioh ban iakren ia ki mat ban wanrah da ki dkhot bad shi sngi ia ka motion bad shi sngi ia ka resolution kaba u sngew ka bym biang.