Lyngba U Bah Don Sumer, khreh ia trei lang ka UDP, Congress ha Jylla?

Shillong, 28 Lber:
Ka jing bym mynjur ka sorkar Jylla, ia ka kyrteng jong U Bah Don Sumer jong ka seng UDP, ba un long U Executive Member, ha Khasi District Council, ka mih mynta da kawei pat ka jingkhein bad katei kam dei satia, ba ki ia pyni bor hapdeng U Mukul Sangma bad U bah PN Syiem Chief Executive Member jong ka Khasi District Council.
Ki lad khu bor, ki iathuh mynta ka sngi, ba katei ka kam, ka la poi sha ka kyrdan jong u heh duh ka Meghalaya Pradesh Congress Committee (I), U Bah DD Lapang bad ki lad khubor, ki kam, ba ka don ka jingiakren mynta bad ki heh jong ka seng UDP, ba kyn thup ia U Dr Donkupar Roy, President heh duh jong katei ka seng, ba ka jing ia treilang bad ka UDP, kam dei satia ban long tang ha Khasi District Council, hynrei, ka dei ban long ruh ha ka sorkar Jylla ruh kumjuh.
Ka dei halor katei ka nongrim, ba ka jing mynjur ia U bah Don Sumer, ka shu sahteng haduh ha kine ki sngi, wat la kam long kaba eh, ia u myntri rangbah, ba un phah noh mar mar ia ka kyrteng jong U Bah Sumer, ba un ai jingmynjur U Lat ka Jylla.
Ka lah don ruh ka jingiakren, ha kine ki sngi, ba u myntri rangbah, u don jingthmu ban pynthymmai noh ia ka kynhun myntri jongu, hadien ka dorbar mang tyngka bad lada ka iaid ha katei ka jingkhein, kumta ka dak jyrngam, ka ap, sa tang ha ka seng UDP bad lada katei ka seng ka mynjur, kumta kin lah ban don ki jingkylla kiba kyndit ha ka sain pyrthei ha ki khyndiat sngi ban sa wan.