Lyngba ka skim MDC, ioh jingmyntoi ka shnong Nongthymmai Kyrdem

Nongpoh: Ha ka sngi ba ka ri hi baroh kawei, ka rakhe ia ka lyngkhuh sngi kha ba 154 u Mahatma Gandhi, kpa ka jaid bynriew, ka shnong Nongthymmai ba hap hapoh ka Raid Madan Kyrdem, Ri Bhoi District, ka la iasnohktilang ban rakhe ia katei ka sngi, da kaba pynlong ia ka jingpynkhuid shnong bad kaba la iashimbynta lang da baroh ki paidbah hapoh ka shnong.

Lyngba jong katei ka sngi, ba ka shnong ka la pynlong ia ka jingpynkhuid shnong, la ioh ruh ban plie paidbah noh ia kawei jaka leit shabar paidbah (Public Toilet), kaba la tei ha ka jinglut kaba la kot sha ka T. 3 lak bad kaba la ioh lyngba ka skim MDC.

Ia katei ka jaka leit shabar paidbah, la plie da u Bah R.R Kharbuki, MDC Umroi bad uba la long kum u kongsan ha katei ka sngi, ha ryngkat ka jingdon u Rangbah Shnong, u Bah Pherlus Mawroh, u Bah Stephan Shadap, u Bah R Lynshing, u Bah Bhalad Mukhim bad kynthup kieei kiwei ki riew rangbah bad ki paidbah nongshong shnong.