Lyngba ka rai ka Meghalaya High Court, shim bynta ki kynthei, ha ka kam jied Rangbah Shnong ha Nohwet

Shillong: Hadien ba ki longkmie ka shnong Nohwet kaba don harum Pynursla kaba hap ha Raid Rangnah, Khyrim Syiemship, ki la leit tied jingkhang ha Meghalaya High Court ba ka ïing kashari kan ai lad ba ki kynthei kin ïoh ïa ka hok ban shim bynta lang ha ka jingjied Rangbah Shnong; ka Meghalaya HC ha ka 14 Lber 2022 ka la ai ïa ka rai ba ki kynthei ki lah ban shim bynta ryngkat ki shynrang ha kaban ïa jied ïa u Rangbah Shnong. Na ka liang ka ophis u Syiem ka Hima Khyrim hadien ba ba ka ïing kashari ka la ai ïa katei ka rai ka la pynmih ïa ka hukum ba yn pynlong ïa ka ilekshon jied Rangbah Shnong ha ka 23 Ïaiong 2022

Haba u Rupang u la leit ban kynduh ban ïakren bad ka Kong Probi Khongknaw, kaba la leit ban tied jingkhang, ka la ïathuh ba ka daw ba kongsan hi ba ki shim ïa kane ka sienjam ka dei beit ban kham pynjanai ïa ka synshar khadar. Ka la ïathuh ruh ba kum ki longkmie kim don satia kano kano ka jingangnud ban ïoh long Rangbah Shnong hynrei tang ban don bynta beit thik ha kaban jied ïa u Rangbah Shnong. Ka Kong Probi Khongknaw, ka la ïathuh ruh ba kane ka jingleit tied jingkhang ban ïoh shim bynta ha ka jingjied Rangbah Shnong ka long ym ba ka kwah pynkheiñ ïa ka riti dustur hynrei ban kham pynjanai shuh shuh bad ban pynkhlaiñ ïa ka synshar khadar.

Haba la kylli pat kaei ka ba pynlong ïa ki kum ka kynhun ban shim ïa kane ka sienjam, ka Kong Probi Khongknaw, ka la ïathuh ba dei hi ka jingkut lad kaba pynlong ïa ki ban shim da kane ka lynti, namar ka la ïathuh ba na ka liang ki longkmie ki la pyrshang ban kren ïa kane, hynrei ka la ïathuh ba kam poi shaei shaei bad dei satang kane ka lynti kaba ki don. Ka Kong Probi, ka la ïathuh ruh ba hadien ba ka la pyrshang ban peit ïa ka rukom shong dorbar bad ka jingjied Rangbah Shnong, kaba ka ong kaba ym dei satia kat kum ka rukom kaba ki lah ban mynjur namar ha ka dorbar ki don ruh ki rangbah kiba leit shong bad jied Rangbah Shnong, ynda la shoh khawiang bad kane hi ka la pynpang nud shi katdei bad dei beit halor kane ka nongrim ka la ïathuh ba ki leit tied jingkhang ha Meghalaya High Court.

Shuh shuh ka la ïathuh ba ka jingïoh mynsiem jong ki ban shim ïa katei ka sienjam ka long hadien, ba ka la ïohi ba ki don ki shnong kiba hapoh ka Hima Khyrim kiba wat ki kynthei ki lah ban shim bynta ha ka jingjied Rangbah Shnong. Shuh shuh ïa la ïathuh ba ka jingkulmar ka synshar khadar bad ka jingpynhiar bad weng Rangbah Shnong katba mon ka dei kawei na ki daw kaba pyndkoh ïa ka synshar khadar ha ka shnong.

Na ka liang ka Kong Probi, ka la kyntu ba uno uno u Rangbah Shnong uban shah jied u dei ban trei hok ïa ka kam na bynta ka bit ka biang jong ka shnong hi baroh kawei khnang ba kum ki nongshong shnong kin ïoh ïa ka synshar kaba khuid bad kaba beit, ka la bynrap.