Shillong: U general secretary ka AICC ba peit ia ka North Eastern u Luzinho Faleiro u la kam ba ka Congress borabor ka peit bad ieng ban iada ia ka jinglong kyrpang jong ki briew ka dong mihngi hynrei ka BJP ka leh da khongpong. U la kynnoh ba ki seng riewlum jong ka dong mihngi, kila iarap ia ka BJP ban wan rung bad bsuh khlieh lyngba ka shatri ka North East Democratic Alliance (NEDA).
Haba kren hadien ka jingwan iakynduh ia ki nongkitkam bad ki MLA ka party ha Shillong myn hynnin ka sngi, u Faleiro u la ong ba ki seng riewlum kim dei ban kmen mynta shipor namar ba kin sa shah synshar khnoit pat hadien ha ka BJP.
“Ki seng riewlum ki kyrshan ia ka NEDA ha kaba u chairman u dei u Amit Shah bad baroh ki tip ia ka buit ne agenda jong ka BJP bad ka RSS”, la kynnoh u Faleiro.
U la ong ba ka BJP ka la pynduh ia ka kyrdan kyrpang ne Speicial status ia ka dong mihngi kaba 90% percent ka jingbei pisa ia ki jylla ka dong mihngi la leh da ka sorkar pdeng na ka bynta ki kam pynroi, hynrei mynta kam don shuh kane.
U la kynthah ruh ba ka BJP ka la pynduh ruh ia ka Planning Commission bad mynta ki jylla kane ka dong mihngi kila iakyrthat namar ka jingkyrduh pisa.
U la kam ba ka Congress ka dei ka party kaba ngeit bad trei katkum ka synshar paidbah hynrei ka BJP ka la pynjot ia ka synshar paidbah, ka pynjot ia ki thymmei ki tynrai jong ka synshar paidbah.
Ha kajuh ka por, u Faleiro u la ong ba ka jingwan jongu sha ka nongbah ka long ban pynkhlaiñ ia ka party bad kiwei ki kam.
Halor ka Citizenship Amendment Bill (CAB), u Faleiro u la kam ba ka Congress lem bad kiwei ki paralik, ka la ialeh pyrshah ia kane ka Bill ba la wanrah ka Bill hynrei mynta ka BJP ka la thmu ban wanrah biang ha parliament ha u Naitung.
Katkum ka jingkynnoh u Faleiro, ka CAB ka long ka jingma kaba khraw ia ka dong mihngi.
Ha kawei ka liang ha kaba kylli ia ka jingdon ki MLA ka Congress ban phet, u Faleiro u la ong haduh mynta kam don kano kano kaba kum kata.
“Ngam iohi ban don uno uno u bymman haduh mynta”, u la ong.
Lah ban kdew ba u Faleiro uba shah bynshet ha ka Congress ban peit ia ka dong mihngi, u la wan ar sngi sha Meghalaya na ka bynta ban iathew iawoh kumno ban pynkhlain ia ka party hadien ba ka party ka la shah rem kput ha ka elekshon MP dang shen ha ka ri, watla ka la jop kawei ha kane ka jylla.
Phi don ban ong eiei?