Nongpoh: Ha ka sngi kaba la sdang ia kawei ka Tamasa iakob king lieng kaba la tip kum ka Megha Kayak Festival 2022 bad kaba la pynlong da ka Ri Bhoi Water Sport & Tourism Cooperative Society Ltd lem bad ka Meghalaya Tourism, ia kaba la pynlong ha Wah Umtrew kaba don hapoh ka shnong Umtham Ri Bhoi, ki la don ki katto katne ngut ki nongkieng lieng ba la pawnam ha ka pyrthei, kiba la wan ban iashimbynta.
Ki nongwan iashimbynta ha katei ka jingiakob king lieng, kiba la pawnam ha kylleng ka pyrthei bad kiba la long ki nongjop ha ki Olympic, ki kynthup ia u Giovanni De Gennaro na Italy, ka Sofia Reinoso na Mexico, ka Vavra Hradilek na Czech Republic, ki World Champion loat ki kynthup ia u Nouria Newman na France bad u Adrian Mattern na Germany. Nalor kitei ki nongkieng lieng ba la paw nam ha ka pyrthei, ki la don ki na India bad nalorkata ki la don kumba 15 ngut na ka jylla Meghalaya, kiba la wan na ki shnong bapher bapher bad kiba la wan ban iashimbynta ha katei ka jingiakop.
Haba kren sha ki lad pathai khubor, ki nongpyniaid ia katei ka jingiakob kinglieng, kiba kynthup ia u Ian Vincent bad ka Sheela Vincent, ki la ong ba ka jingthmu jong ki ban pynlong ia katei ka jingiakop kieng ba pawnam ha ka pyrthei, ka dei namar ba ki don ia ka jingthmu ba ka Meghalaya, ba kan paw kum kawei na ki jaka kieng lieng kaba pawnam ha ka ri bad ha ka pyrthei hi baroh kawei, namar tang ki nongwan ban iashimbynta ha katei ka jingiakop, ki dei ki briew kiba la bna nam tam ha ka pyrthei hi baroh kawei.
Phi don ban ong eiei?