Shillong: Ka Shillong Lajong FC ka la shah rem ha ka jingialehkai sdang ka U-18 Youth League Zonal Round ha ka Langsning FC kaba long myn hynnin ka sngi ha madan MFA, Shillong.
Ka Langsning ka la pynliem lyngba kawei ka kol ba la thep da u Damonlang Pathaw ha ka 40 minit.
Ka Shillong Lajong kaba pyndonkam ban ialehkai da ki nongialehkai ba dang khynnah bad dang thymmai suda ha kane ka aiom ialehkai jong kane ka lumpung.
Toi, ha ka jingialehkai, ka Lajong ka la ioh bun ki lad hynrei man ba ka pyrshang kam shym la poi sha ka thong kumba ka la thmu.
Shwa ba ka Langsning FC kan ioh ban pynkhih jar da u Damonlang Pathaw ha ka 40 minit, ka Lajong ka la dep ban pynkyndeh mynsiem ia ki nongialehkai ka Langsning namar ba ka la ioh bun ki lad ban thew sha ka kol hynrei ki khlem urlong.
Hadien ba ka la shah thep, ka Lajong ka la ialeh-kai kham satar bad ka la don ki khep ba ka la ioh hynrei namar ba kham sian ti u nongap kol ka Langsning, ka khlem lah ban pynpei lyngba ia ka kol.
Ka Lajong ka la hap ban mih noh na madan khlem ioh eiei bad mynta kan pynkhreh ban iakhun GTC ha ka 27 tarik Risaw ha Guwahati por 2:30PM.