Lyngba ka Bangladesh, yn poi khaw 3hajar ton sha Tripura

Agartala, 9 Jylliew:
Sa tang hapoh ar taiew, ka Tripura, kan ioh ia u khaw, uba tad bha ka bai kit bad ka daw ka long, namar ba ia u khaw bam jong katei ka Jylla, yn pynkit noh lyngba ka jhad, kaba iaid na Bangladesh ban leit pynhap mar sha Agartala.
“Ka jhad kaba kit ia 3hajar ton u khaw, ka la mih na kad jhad ha Haldia kaba ha West Bengal, lyngba ka wah kad jhad jong ka Ashuganj ha Bangladesh. Na Ashuganj, yn kit sha Tripura, da ka surok” la iathuh u heh sorkar jong ka Jylla Tripura.
“Ka thup kaba nyngkong, kan poi ha Tripura, hapoh 10 haduh 15sngi bad ha ki khyndiat bnai ban sa wan, yn kit sa 10hajar ton u khaw sha Tripura lyngba katei ka lynti iaid” la iathuh.
Ka kad jhad jong ka Ashuganj, kaba don ha mihngi jong ka Bangladesh, kaba hap ha ka District Brahmanbaria, ka don tang 35 Kilometre ka jingjngai na Agartala.
“Ka sorkar Bangladesh, ka la mynjur ban kit ia 10hajar ton u khaw sha Tripura, lyngba u pud u sam jongka” ong u myntri kam bam kam dih jong ka Tripura, U Bhanulal Saha ha ki khyndiat sngi ba ladep.
Hadien ba la ioh ia katei ka mar bam, ba kynthup ia u khaw, u kew bad ka shini ban pyndonkam ha Tripura, yn sa sam lang ruh ia katei ka mar bam sha kiwei de ki Jylla jong ka dong shatei Lam Mihngi, kiba kynthup ia ka Mizoram, Maipur bad ki bynta ba shathie jong ka Assam.
Ka jingjngai jong ka Agartala, lyngba ka Guwahati, ban wan na Kolkata, ka long 1,650 Kilometre bad 2,637 Kilometre na Delhi, katba ka jingjngai na Agartala bad ka Kolkata, lyngba ka Bangladesh, ka long tang 350 Kilometre.