Lyngba ka AHS, yn shna 175 tylli ki iing ha man ki block

Shillong, 12 Iaiong:
Ka sorkar jylla ka la pynkhreh shaid shaid ban pyntreikam noh ia ka skhim shna iing sha jaka nongkyndong lyngba ka Affordable Housing Scheme (AHS) kaban sa pyntreikam noh ha kane ka snem.
Katkum ka jingiakren bad ka director ka tnad shna iing, ka Kong RM Kurbah, ka sorkar ka la pynkhreh pynkhreh bha ia kane ka skhim bad la don ka jingtyrwa ban mang 175 tylli ki tnum iing ban shna ha man ki block ha ka jylla.
Lada sorkar kan lah ban pyntreikam ia kane ka skhim kumba ka buh thong, ka jingdon jong ki briew ban ioh jingmyntoi na kane ka skhim kan long kumba 6825 tylli ki tnum na ki 39 tylli ki Block ha ka Jylla.
“Ha kane ka skhim, ki nongtrei kam sorkar barit ruh, ki lah ban shim kabu namar ba ka sorkar kan ai jingiarap kumba 75 percent katba 25 percent kan sa long kum ka ram”, la ong ka Kong Kurbah haba iakren mynta ka sngi.
Kat kum ka jingong ka director ka tnad shna iing, ki riew shimet ruh ki lah ban shim kabu na kane ka skhim namar ba kam shym la thew tang ia kiba riew spah hynrei ia baroh.
Ia kane ka skhim, hap pyniaid lyngba ki Block ki ban shim ia ki aplikeshon na ki briew kiba aplai ban shna iing bad ka sorkar kan shong jingialang lyngba ka komiti ban jied ia kiba dei.
Ha kajuh ka por, la iathuh ba ka AHS kam don jingiadei eiei bad ka skhim shna iing baduk ne IAY kaba ju tip paidbah.