Lynga ki paidbah ba sahkut kali, na ki trok kit maw ha Pynursla

Shillong: Ka jingbun ki trok kit maw ba iaid da ki spah tylli ban pynhap maw sha Tamabil, Dawki na thain Pynursla ka la wanrah ia ka jingsahkut blok kaba jur bha.

Mynhynnin ka sngi kaba dei ka sngi long iew ha Pynursla, la ioh jingtip ba ki paidbah kila sngew lynga hi khait haba ki la sahkut namar ba ka jingiaid ki kali kit maw khlem sangeh.
Haba iakren bad ki katto katne kiba pyntip ia kane ka jingsahkut kali, kila kyntu ia u SDO (Civil) ba dei ban khang iaid ia ki trok man ba long sngi iew bad dei ban pyllait tang ha ka miet khnang ban pynlait ia ki paidbah na ka jingsyllang.
La iathuh ba ha ka sngi iew, ka long ka jingma bad ka jingpynjynjar ia ki nongkyndong ban pyndep kam ban iaid ha surok, ban thep nongleit nongwan bad thep tiar tang namar ba khapngiah ka surok bad sahkut kali. Kawei ka dei namar ba ka surok ka la rit bad khapngiah ha Pynursla bad kam don ka surok bye pass ban iaid ki trok kit maw.