Nongpoh:Kat haduh mynta ia ka daw jong ka jingjaboh ka Lyer ha Byrnihat ym pat lah ban tip, namar kat haduh mynta ym pat ioh ia ka Kaiphod bad ia kane la pynshai da u Bah S. Swer, Senior Scientist ka Meghalaya State Pollution Control Board (MSPCB), uba la kren sha ki lad pathaikhubor, hadien ba la kut ka jingialang kaba la khot da u MLA Jirang ha Byrnihat, ban iakren iatai halor ka jingjaboh ka Lyer ha Byrnihat, kaba la ioh ruh ia kata ka nam kum ka thain kaba jaboh tam ha Lyer ha ka ri.
U Bah S, Swer, u la ong ruh ba kumba ka long haduh mynta, ki stad wad bniah halor ka jingjaboh ka lyer, ki dang pyrshang ban wad bad ban tip, la katei ka jingjaboh ka lyer, ka dei na ki tdem kaba mih na ki Karkhana, ka tdem jong ki kali ne ka tdem kaba mih na kaba thang ia ki Plastik lem bad kiwei, hynrei kat haduh mynta ym pat ioh ia ka Kaiphod.
U la ong ruh, ba ia katei ka kamram ban wad jingtip halor ka jingjaboh ka Lyer ha Byrnihat, la leh da ki stad Saian jong ka Council of Scientific & Industrial Research (CSIR) jong ka National Environmental Engineering Research Institute (NEERI), ha kaba lyngba ka jingwad jingtip da kitei ki stad bniah, yn sa tip ba naei ka Lyer jaboh kaba la pynmih ha Byrnihat bad kaba pynlong ia ka Byrnihat, ba kan ioh ia kata ka nam kum ka thain kaba jaboh eh ka Lyer.
“Kumba ka thain Byrnihat, kaba dei ruh ka thain khappud ha kaba ha ka liang Meghalaya bad Assam ki don ki Karkhana kiba pynmih tdem, ia katei ka bynta ruh ki stad wad bniah ki dang wad jingtip, ha kaba ia kata ki stad wad bniah ki dang wad bniah, la ka jingbeh ka Lyer ka jur na Meghalaya sha Assam ne na Assam sha Meghalaya bad haba la ioh lut ia kita ki Kaiphod, yn sa tip lut baroh na kane ka jaka kaba pynmih bun ka Lyer jaboh, la ka long na Meghalaya ne Assam” ong u Bah S. Swer.
Phi don ban ong eiei?