Nongpoh: U MLA ka Jirang Constituency, u Bah Sohthenes Sohtun, u la pynlong da ka jingiakynduhlang hapdeng ki nongialam shnong jong ki shnong naduh Lailad ter ter shaduh Umrit bad ha katei ka sngi, ki la ioh ban iatai halor shibun ki jingdonkam jong ki paidbah kiba sah ha kitei ki shnong.
Haba pyntip sha ki Nongthohkhubor, u Bah Sosthenes Sohtun, u la ong ba ia katei ka jingialang la khot da ma u kum u MLA, ia kaba ki ka pynlong ha shnong Nongladew, haba kaba u la khot khnang ia kitei ki nongialam shnong bad riew rangbah, ka long ban wanrah ia ka jingiatreilang hapdeng u Nongmihkhmat, ki nongialam shnong lem bad ki paidbah, ha kajuh ruh ka por ban ioh iakren bad iatai sani bhai halor ka jingdonkam ki paidbah ban ioh ia ka roi ka par ha shnong ha thaw.
U la ong ruh, ba kum u Nongmihkhmat kam long kaba bha, ban leit kynduh nongialam shnong tang ki por Ilekshon, hynrei ka long ruh kaba donkam ban leit iakynduh hadien ba la long kum Nongmihkhmat, khnang ban sngewthuh kham bha ia ki jingeh jong ki paidbah bad katno tam haba u la dep ban kular ha ki paidbah ba un trei shitom, na ka bynta ban wanrah ia ka roi ka par bad ka bha ka miat hapoh ka Konstitwensi hi baroh kawei.
Haba batai halor katei ka jingialang, u la iathuh ruh, ba ha katei ka jingialang kitei ki nongialam shnong bad ki riew rangbah, ki la pynpaw ba kitei ki shnong ki dang donkam ban ioh shibun ki kam pynroi bad shibun ki jingeh kaba la iakynduh da ki paidbah, hynrei kawei na ki jingeh kiba hakhmat eh, kaba ka iakynduh da ki paidbah ha katei ka thain, ka dei halor ka jingsniew ka surok na Umling ter ter shaduh Umrit.
Kumta lyngba jong katei ka jingialang, ki rangbah shnong bad ki riew rangbah jong katei ka thain, ki la pynpaw ba ia mynta hi ka thong kaba hakhmat eh ka dei ban shna pynbha bad pynheh ia katei ka surok, kaba la pyndonkam da baroh ki shnong jong ka thain Ri Bhoi Sepngi.
Phi don ban ong eiei?