Lum U CEM ia ki khlieh Nongsynshar

Shillong, 6 Naiwieng:
La ioh khubor, ba ka Executive Committee jong ka Khasi District Council, ka la khot ia ki 53ngut ki khlieh nongsynshar, kiba hap ha ka jingpeit jong ka Council, ban pynlong ia ka jing iakren, halor ka jinglong jingman jong ka suk ka sain ha Khasi Jaintia ha kine ki sngi bad kumjuh ban iakren ruh halor ka jingdawa Inner Line Permit jong ki Sengbhalang.
Ha katei ka jingialang, ka ban long ha Khasi National Dorbar, la khot lang ruh ia ki 30ngut ki MDC, ba kin ia don lang ha katei ka jingiakynduh, ka ban long ha ka 11tarik mynta u bnai, ha ka por 11baje mynstep. La bthah ruh ia ki Syiem, ki Sordar, ba kin wan ialam ruh ia 5ngut ki dkhot jong ka Dorbar jongki, ba kin ia don lang ban ai jingmut halor ka jinglong jingman ka suk ka sain ha kine ki Sngi ha Khasi Jaintia.
Halor katei ka jingkhot jong ka Executive Committee, ka mih ka jingiakren, la U CEM, u don jingmut ban iakren ha kano kano ka phang ia ka mat jong ka Inner Line Permit, khamtam haba ka HSPDP lem bad 3ngut ki MDC jongka, ki la mih noh na ka Executive Committee bad nangta ba ka don ka jingiakren ba wat ki MDC jong ka UDP ruh kin lah ban mih noh na kane ka kynhun iatreilang KHUDA, kaba la khlieh da ka Congress ha KHADC.
Ki pyrman sain pyrthei, ki iathuh ba lada jia ba kan mih sa ka UDP, na kane ka kynhun synrop, kan don ka jing artatien kaba khraw ba U bah PN Syiem CEM jong ka KHADC, ba un lah ban dang iai bteng ia ka shuki CEM ha KHADC bad katei kan lah ban ialam sha ka jingsynshar jong U Administrator haduh ban da poi ka elekshon MDC ha u snem 2014.