Lum noh mar mar ia ka jingialang ban iakren halor ka Reservation Policy, ong ka UDP

Shillong: Ka seng United Democratic Party (UDP), ka dawa ia U Conrad Sangma, myntri rangbah ka jylla, ba un lum noh mar mar ia ka jingialang jong ki seng sain pyrthei bapher, na ka bynta ban iakren halor ka Reservation policy lane ka ain bhah kam bhah jam, ha ki ophis sorkar jylla.

Ka kyrwoh, na U bah Allantry Franklin Dkhar, Vice President jong ka seng, ka pynsngew, ba kane ka dei ka mat, kaba la iakren, ha ka jingialang, kaba dang shu iakynduh shen jong ki nongialam jong ka seng UDP. Na ka liang jong ka seng UDP, ka la kren shai, ha ka mat ilekshon MLA jongka, ha ka sien ba ladep, ba kawei na ki mat jongka, ka dei ban peit biang halor ka bhah kam bhah jam jong ka sorkar jylla.