Lum ki Pulit pyniaid kali ia ki nongniah kali kamai, ban batai halor ki ain niah kali ha surokbah

Nongpoh, 10 Lber: Ka tnat jong ki Pulit pyniaid kali na Nongpoh Police Station, mynta ka sngi ki la pynlong ia ka jingialang bad ki nongniah kali kamai, kaba long ruh kum shi bynta ban ai jinghikai ia ki nongniah kali, ba kumno kin nang ia ki ain niah kali ha surokbah bad khamtam eh na bynta jong kito kiba niah ia ki kali kamai ha surokbah NH-6 ha Ri Bhoi.

Ha katei ka sngi, ba ki Pulit pyniaid kali ka Nongpoh Traffic Branch, ki la pynlong ia katei jingialang ban batai ia ki kyndon ain niah kali, la wan ban iashimbynta da ki nongniah Local Taxi, ki nongniah Auto Rickshaw kiba kamai ha Sor Nongpoh.

Lyngba jong katei ka sngi, ki Pulit ki la ioh ban pynshai sha kitei ki nongniah kali, kaba kynthup naduh ka jingdonkam ban don ia ki Driving License, kaba deng ia u seat belt, deng helmet ha ka por ba niah ia ki arshaka, kiar na kaba niah kali ha ka por ba la dih kyiad lem bad shibun kiwei pat kiba iadei bad ki kyndon niah kali.