Lum ki Congress ba shah tian bishar ka Sonia bad u Rahul

Shillong, 20 Nohprah:
Ha ka sngi saitjaiñ jong ka taiew ki nong ialam ka seng Congress kynthup naduh ki Myntri sorkar jong katei ka seng,ki MLA, ki MDC, ki nongkitkam ka MPCC, President jong ka DCC, BCC, ki kynhun shnat seng bapher bad ki dkhot jong katei ka seng ki la ia lum khrui ha Congress Bhawan, Shillong ha ka por 11 baje mynstep ban ia shong pyrkhat halor ka jingshah tian bishar ka President rangbah katei ka seng ka Sonia Gandhi bad kumjuh ruh u Vice President u Rahul Gandhi.Katei ka jingialang ka seng Congress na kane ka jylla ka la ai jingkyrshan ia kitei ki ar ngut ki nongialam rangbah jong ka shuwa ba kin leit shah tian bishat ha ka Patiala High Court ha katei hi ka sngi halor ka kes ba la ujor da u MP ka BJP u Shri Subramaniam Swamy, pyrshah ia ki halor ka kes National Herald.
Haba kren ha katei ka jingialang ka seng Congress u bah A.H Scott Lyngdoh , u MLA barim uba dei ruh u Vice President ka MPCC u la batai ia baroh ki dkhot ka seng Congress ia ki jingshisha ba ia dei bad katei ka kes ka National Herald, Associated Journal Limited bad ka Young India Limited. U la batai ba katei ka kes ka dei tang ka kam leh politik jong ka sorkar BJP kaba ialam da u Narendra Modi, u la iathuh ruh ba ka la don ka jingleit ialap pyrshah ia ka seng Congress halor ka GST Bill, kaba u la ong ba ka dei ka jingialam bakla ia u paidbah. U la pynkynmaw ba la khyllie biang ia ka kes National Herald wat hadien ba u Enforcement Director, ba rim u Shri Rajan Kotch u la lap ba ka long ka bym don nongrim. U la kyntu ia ki dkhot ka seng Congress ba kin ia tylli ban ia khun pyrshah ia ka sorkar u Modi lada ka wan kano kano ka jingle pyrshah ia ka seng Congress bad ki nongialam jong ka.Kham hadien ka kyrwoh na katei ka seng ka la ong ba kila ioh jingtip ba ha ka jingbishar ia kitei ki ar ngut ki nongialam jong ki ka ing bishar ka la ai jamin khlem ka jingteh kyndon, katei ka jingialang ki nongialam ka seng Congress ka la rai ba haduh mynta ki dang shaniah skhem hapoh ka jingialam jong kitei ki ar ngut ia katei ka seng.