Lum ka KHADC ia ki trai khyndew, namar ka jingshah khang tih dewiong

Shillong, 5 Naitung:
Ka Khasi Hills Autonomous District Council (KHADC) mynta ka sngi ka la lum ia ka jingialang hapdeng ki trai par khyndew bad ki trai par dewiong na kylleng ka ri lum Khasi –Jaintia ban ia kren bad pan jingmut kumno ban weng noh ia ka jingeh kaba ki ia kynduh namar ka jingshah khang tih dewiong ha ka National Green Tribunal (NGT).
Nalor u CEM bad ki MDC ha katei ka jing ialang la don kumba 50 ngut ki trai par khyndew bad ki trai par dewiong kum na ka thaiñ Shahlang, Borsora, thaiñ Sohra bad kiwei pat ki jaka, la donlang ruh katto katne ngut na ri Lum Jaintia. Haba kren sha ki nongthohkhubor hadien ba la wai katei ka jingialang u CEM ka KHADC u bah Pynshngaiñ N Syiem u la ong ba ka rai kaba la mih na katei ka jingialang ka long kino kino ki kynhun ne ki seng kiba kwah ban leit ujor sha ka Supreme Court lane kiba la dep ujor sha ka Supreme Court halor ka jingshah khang tih dewiong ha ka NGT ki dei ban ia syllok shuwa bad ka District Council khnang ba ka nongrim ba kin ieng ha ingbishar ka dei ban long beit thik kajuh ka nongrim jong ka KHADC kata katkum ka rukom bat khyndew bat shyiap.
U CEM u la ong ruh ba un sa thaw ia ka kynhun jong ki riew shemphang ba kynthup ia ki stad aiñ, ki stad mariang, na ka bynta ban pyrkhat da kano ka lynti kin iaid ban weng noh ia katei ka jingeh, u bah Pynshngaiñ u la ong ba katei ka kynhun kan peit bad iakhun ban pynioh biang ia ka jingtih dewiong da kaba pynthikna ba kan ym ktah eiei pat ia ka mariang. U la kren ruh halor ka jingbym lah bad ka jingpynslem ka sorkar jylla ban thaw ia ka aiñ khlong mar pohkhyndew ne ka Mining Polisi ha kaba u la ong ba na ka liang ka District Council ka kyntu jur ia ka sorkar ba kan pynkloi noh ia katei ka aiñ.
Shuh shuh u la ong ba ka KHADC kan sa shong pyrkhat ban ia syllok lang bad ka JHADC kumjuh ka GHADC na ka bynta ban shim ia ka juh ka jingmut haba leit ia khun ha Supreme Court ban ban jur halor ka rukom bat khyndew bat shyiap namarba baroh lai ki district Council ki long kajuh bad la kdup ia ki da ka 6th Schedule.