Lum ka AASU, da ka jing ia snoh kynjri ban pyrshah CAA

Ka Tezpur unit jong ka All Assam Students’ Union (AASU), hynnin ka sngi, ka la pynlong ia ka jing ia snoh kynjri ban pyrshah ia ka ain CAA ha ka nongbah Mission Chariali.

Palat 2hajar ngut ki la ia shim bynta ha katei ka jing ia snoh kynjri bad ki da pyrta pyrshah ruh ia U Sarbanando Sonowal, myntri rangbah Assam, U Narendra Modi, myntri rangbahduh bad ia ka seng BJP. Ka jing ia hylla paidbah, ka sdang naduh ka por 12baje haduh 1 baje nohsngi. Da katei ka jing ia lum paidbah, la khang sbak ia ka surok bah NH 37 (A) bad ki kali ki la sahkut lut ka iaid ka ieng ha katei ka por.

U Arup Talukdar, President ka AASU ha Tezpur, la kren ha ka jingialang, da kaba ong “U paidlang ka Assam, un nym ailad satia ban shah pynlong kum ki soh shnong ha la ka jong ka Jylla, kumba la jia ha Tripura. Ngi don ia la ka jong ka kolshor, ia la ka tynrai bad ngin nym ailad ia kiwei ban pynduh pyndam”.