Shillong: Hadien ba ka MeECL ka la iakynduh ia ka jingeh ha kine ki sngi namar ka jingbym pat pyllait ia ka tulop jong ki nongtrei, bad ka jingshah thalaiñ ha ki paidbah ia ka jingbteng ban pynlip ding, u myntri rangbah ka jylla mynta ka sngi, u Conrad K Sangma u la lum ia ka jingialang ia ki ophisar kane ka tnad pynmih ding ka jylla ban iakren bad kumno ban pynbeit ia ka jingeh.
Ha kane ka jingialang kaba long ha ophis ka MeECL ba la pyniaid da u myntri rangbah, la iakren halor ka jingbym pat pynlait ia ka tulop ki nongtrei la ar bnai eiei bad khamtam ka jingbteng ka jingpynlip ding da ki kynta namar ka jinghiran bording ka jylla.
“Ngi la shim ki rai ban pynthikna ba yn pynbeit ia ka jingsahkut ka tulop ki nongtrei bad kumjuh ia ka jingpynlip ding kloi katba lah”, la ong u myntri rangbah ha ka jingthoh ba la thep ha ka Facebook jong u.Kiba don lang ha ka jingialang ki kynthup ia u Chief Secretary uba dei u CMD bad ki heh ka MeECL.
Lah ban kdew ba ia ka tnad bording la bat da u hymmen u Conrad, u James K Sangma, uba la shah thalaiñ jur ia ka jingtlot ka rukom treikam jong kane ka tnad, khamtam ka jingshah pynlip ding kaba bun kynta ha kylleng ki jaka ha ka jylla.
Phi don ban ong eiei?