Lum jingialang ka KSU, ba sniew surok tasam, ka surok Pynursla Dawki

Shillong:Ka seng Khasi Students Union (KSU) kan sa pynlong ia ka jingialang ban ia pyrkhat lang halor ka
jingsniew shaba palat jong ka surok Pynursla-Dawki, NH 40 ka ban long ha ka 24 tarik naitung 2023 ha Ïingdorbar Neng-Gate ha kaba ka la wer ruh ia ki nong synshar shnong, ki trai kali bad kiwei pat kiba don ka jing sngewkhia ia kane ka jingeh, kum ki paidbah jong ka thaiñ ki mad.

Ha ka shithi ba la phah sha ki nong synshar shnong, na ka liang ka Khasi Students’ Union (KSU) South Central East Circle, Pynursla, da ka mynsiem kaba sngewkhia bad ka dohnud ba sngew buhkhoh halor ka jingsniew shaba palat ka surok na Pynursla sha Dawki NH-40 bad ia ka jingleh bym suid niew bad jingbym khein briew da ki bor ba dei khmih ia ki paidbah nongshong shnong jong ka dong ka thain Riwar Mihngi, Pynursla, kumta la wer lyngba kane ka kyrwoh ban khot ban wer, sha ka jingialang ki khlieh nongsynshar shnong, ki nongialam jong ki synjuk trai bad nongniah kali ban ia pyrkhat lang bad ban iathir iatai halor ka jingsniew shaba palat jong kane ka surok bad khnang ban shim ruh da ki rai kiba tyngeh pyrshah ia ki bor ba dei khmih kiba la leh kyllut bad leh matlah ia kane ka jingeh u paidbah.

Ka jingialang kan long ha ka 24tarik Naitung 2023 ha Iing Dorbar Dong Nenggate, Pynursla ha ka por 1 baje nohsngi, ong ka kyrwoh, ba la pyllait da u samla ksanborlang Thabah General Secretary jong ka KSU South Central East Circle, Pynursla.