Shillong: U Bah Fairson Kharjana, U headmaster Mitchangdong Nongsyllei Secondary kaba don ha Lawbyrtun, u la mih sha khmat ban pynpaw ia ka jingbynniaw halor ka jingpynmih jingbthah jong ka tnad pule puthi jong ka jylla ha kaba ia dei bad ka jingthmu ban pynlong exam selection ia ki khynnah private ka ban sdang ha ka 25 tarik mynta u bnai ha East Khasi Hills bad ha ka 1 tarik u bnai ban wan ha West Khasi Hills.
Haba ia kren bad ki lad pathai khubor, na ka liang u bah Kharjana, u la ong ba ka long kaba lyngngoh ba na ka liang ka tnad pule puthi jong ka jylla ka la shim ia ka rai ban pynlong ia ka examin selection, ha ka 25 bad 1 tarik, namar ba ki khynnah mynta u snem ki dang ioh ban wan skul ym duna ia ka ar bnai eiei.
“Ka skul kam pat long bha hynrei ka tnad ka la kloi ban pynbeit ia ka tarik ban pynlong ia ka ne ka examin selection namar ba ki khynnah skul ki dang donkam por ban ioh ia ka jinghikai ka ba pura khnang ba kin lah ban pynkhreh ia kane ka exam final”.
U la ong ruh ba kane ka jingthmu ban pynlong ia ka examin selection ia ki khynnah kiba dang ioh lad ban wan skul tang mynta dang ar bnai ka la pynlong ia ki khynnah ba kin kulmar khlieh, ha kaba na ka liang ki khynnah ki la buh ka jingkylli ia ki nonghikai ba kin sdang naei ban khreh kot bad ki nonghikai ruh kim sngewthuh shuh ba kin sdang hikai naei. U la ong ruh ba na ka liang ki nonghikai ruh ki la shem jingeh wat ban pyndep 80% ia ki subject kiba dei ban ai jinghikai, tang hapdeng kine ki ar bnai ha kaba ka la pynlong ia ki ban shu ai jinghikai khlem kano kano ka jinglah ban pynsngewthuh pura ia ki khynnah skul.
Na ka liang une u Headmaster u la kyrpad ia u myntri ka tnad pule puthi u bah Lahkmen Rymbui ba un shim khia ia kane ka bynta, ha kaba yn weng noh ia kane ka jingpynbna ban pynlong ia ka examin selection bad ba yn ai lad shuwa ia ki khynnah ba kin wan sha skul bad ba kin ioh ka jingshah hikai ba pura na ka bynta ka Examin final.
U la kyrpad ruh ia ki Association jong ki nonghikai bapher bapher ha ka jylla ba ki dei ban shim khia lang ia kane ka mat ba ktah ia ki khynnah skul ban pynpaw ia kane ym ba ka Assiociation jong ki kan mih khmat tang na ka bynta ban dawa ia ka tulop jong ki. U la ong ruh ba ka online Class, khamtam ha ki thain nongkyndong ka don jingeh kaba khraw bad halor ka online class yn pynlong ia ka Examin selection mynta kan long ka jingbiej jong kane ka tnad.
Hooid dei ban weng ia kane ka selection examination ,ngi la shem jingeh shikatdei eh ngi kum ki khynnah skul ban prepare ban pyndep ia baroh ki syllabus namar ka syllabus ruh ki la pynkylla shi pynkylla manka por ..ka tnad pule kam da pyrkhat shuh ia ka jingeh kaba ngi kum ki khynnah skul ngi shem da kaba pule online bun ki por ka network ruh kam da biang bha khamtam sha nongkyndong..