Long kiba shlur , ong ka SSSS ia ka Seng Samla Sohra

Shillong,29 Nailar:
Ka Synjuk ki Seng Samla Shnong haba phah ia ka kyrwoh kit bok kit rwiang ia ki dkhot ka Seng Samla Sohra kiba la shah jied thymmai ha kane ka kynti kaba mynta ban trei bad ban tei ia ka shnong ka thaw khamtam ha kaba ia dei bad ki samla jong ka shnong. Ka synjuk ka kyntu ia ki dkhot jong kane ka seng samla ba kin iai tur shaphrang na ka bynta ban rat diengkhong ia ki jingsniew kiba pyntroin ia ki khun samla kynthei bad shynrang bad kumjuh ruh ban iai minot thop ha ka ban iatylli mlon kawei bad ia kyntiew iwei ia iwei ha man la ki kam kiba ia donkam markylliang. Ka SSSS kaba ju ieng ha ka nongrim ban “shakri da ka jingshemphang” ka kyntu kumjuh ia ki dkhot ka seng samla Sohra ba kin long kiba shemphang bad kiba shlur ban leh ia kaei kaei kaba bha eh na ka bynta ka imlang sahlang khnang ba kin long ka nuksa ia ki ban sa shimti pat ia ka kam.