Shillong: Myn hynnin ka miet ka dei ka miet kaba baroh ki riew ieit phutbol ha ka pyrthei ki iai ap dngong ban ioh peit kai ia ka jingialehkai phainal hapdeng ka France bad ka Croatia bad ka dei ruh ka miet kaba pynbitar ia ki paidbah ka thaiñ Ri-War Pynursla naba bun ki shnong ki bym shym la ioh bording.
Ki la don bun kiba la phone sha u Rupang ban pyntip ia katei ka jingjia bad kiba bun ki don hapdeng ka jinglynga mynsiem na ka daw ba kim ioh peit phutbol.
La iathuh ba ka jinglip bording ha ri War ka la sdang naduh Laitlyngkot, Lyngkyrdem bad ter ter shaduh ki thaiñ kiba don sharum ka Pynursla.
La iathuh ba ka bording ka la meh ding 5 minit shuwa ban kut ka jingialehkai.
Ki don ki shnong ha katei ka thaiñ kiba ki paidbah ki la mih ha madan ban pyrta pynrem ia ka MeECL bad la ong ba ki don bun bah ki khynnah samla kiba mih ha madan ban tim sih tim sang namar ka jingbym lah pynbiang bording ka MeECL bad katei ka buh jingeh ia ki bor shnong.