Liem U GNLA ha ka jingiasiat, lait phet u Area Commander Shah kem ka samla u lehnoh ruh

Shillong, 23 Jylliew:
Uwei u dkhot ka seng lehnoh ka Garo National Liberation Army (GNLA) u la shah siat iap ha ki pulit, katba u Area Commander u Ajan Mo min, uba khot sin kum u Jimmy u la lait phet na kti jong ki pulit lem bad san ngut kiwei pat ha ka jingiather hynne ka sngi ha East Garo hills district.
Ha ka jingiasiat kaba la neh kumba 20 minit, uwei u dkhot ka GNLA u la liem bad uwei pat u la shah kem. Une uba shah siat iap la tip kyrteng kum u Cheman Momin katba uba shah kem la tip kum u Pisto Sangma.
Ki pulit ki la kem ruh ia kawei ka kynthei kaba la pynithuh ialade kum ka samla u Jimmy.
Kumba ha ka por 10 baje janmiet, ha ka sngi u Blei ki pulit ka East Garo hills lem bad ki Special Weapons and Tactics (SWAT) bad Combat Battalion for Resolute Action (CoBRA) ki la pynlong ia ka jingkyndang ha ki jaka rieh jong ki lehnoh ha kawei ka shnong ha Mikilsimgre kaba jngai kumba 19 km na nongbah Williamnagar.
Kumba hynniew ngut ki dkhot ka GNLA ki la pynlong ia ka jaka rieh ha katei ka shnong.
U SP ka East Garo hills u Davies Marak u la ong ba ki pulit ki la pynlong ia ka jingkhynra hadien ba la ioh ia ka jingtip ia ka jingrieh tngen jong ki lehnoh ha katei ka shnong Mikilsimgre. Ha ka jingkyndang jong ki pulit ha ka por mynstep, ka suin bneng ka long slap bha, u nongap jong u Piston Sangma u dang thiah. Ngi kem ia u bad u la ialam ia ngi sha jaka ba rieh kitei ki dkhot kaba long kumba 15 meter ka jingjngai na jaka rung”, la ong u SP.
U Marak u la ong ba ki bor pulit ki la ap kumba 10 – 15 minit ha ki lai tylli ki iing ba kitei ki dkhot ka GNLA ki dang rieh tngen.
Ha kane ka por uwei u dkhot u la mih bad u la siat sha ki pulit bad ki pulit ki la pynphai kylla, bad ka jingiasiat ka la neh kumba 15-20 minit bad u Jimmy lem bad san ngut ki dkhot ki la lait phet noh. “ngi thikna ba ki la mynsaw ha kane ka jingiasiat. Hynrei ngim pat lah ban tip la u dei u Jimmy ne em uba mynsaw”, la ong u SP.
Ki pulit ki la ioh kurup ruh ia ki tiar siat kynthup kawei ka AK-56, 6 ki magazine kuli, 2 pistol 7.65 mm, 3 magazine, 19 ki wire, ka suloi STBL bad 8 ki bakhor, 1 grenade, 3 wireless set, IEDs, gelantine wax, ka plastik ba thep ia ki tiar siat, 160 ki kuli ka AKs, 7 kuli ka .22 pistol, 28 ki plas thylli ka AKs, kawei ka seal ka GNLA, kawei ka stamp ka GNLA ba dei jong u finance secretary, 4 tylli ki mobile handset, ID card, ki badge ka GNLA bad ki dur bula ka GNLA.
Ka ID ka GNLA ka dei jong u Jimmy, u Werong D Sangma bad u Banchrang A. Sangma.