Shillong: Ka TRAU FC na Manipur ka la pylliem thiaw ia ka Langsning ha ka jingiakhun jong ka Second Division League 2018 da 1-0 kaba long mynta ha madan Jawaharlal Nehru Stadium Shillong.
Ia kane kawei ka kol ia ka TRAU la thep da u Nelson Kom ha ka 44 minit kaban long artad ka kol jong ka jingjop ban khur lai point na kane ka jingialehkai.
Ha kane ka jingialehkai, ka Langsning ka la pynbujli nongialehkai haduh saw ngut ha kaba u PoibiangPohshna u hap ban shong noh namar ka jingmynsaw katba u DonborlangNongkynrih bad u Ronaldkydon Lyngdoh Nonglait, ki la mih bujli. U Coach u Bah Hering Shangpliang u la pynap kol da u Frolicson Dkhar ha jaka u Surjay Kumar Pariyar.
Ha kane ka jingialehkai, ka TRAU ka la kham ioh ia ka lad ban pyrshang ha ka kol ha kaba u nongialehkai jongka, u Reisangmei Vashum u la jan ioh ban thep ha ka 15 minit.
Na ka liang ka Langsning ruh lyngba u Kitboklang Pale u la jan ioh ban thep ha ka 23 minit hynrei kam shym la lah ban ksam lyngba ia u nongapdien ka TRAU u Jonette Phillipe.
Ka nam rem ia ka Langsning ka la wan hashwa ban wai syndon ka kylla step ha ka 44 minit ha kaba u Nelson Kom u la ioh ia ka lad ban khyrwit na ka bol ba kynjatbol na dong ban pynrung jlan ha ka kol.
Mynta ka Langsning ka hap ban leit iakhun shabar na la ing pyrshah ia ka Jamshedpur FC reserves ha ka 4 tarik Iaiong katba ka TRAU kan pdiang ia ka Mohammedan Sporting ha kajuh ka sngi ha Imphal.
Ka Langsning bad ka TRAU ki ia kamai mar 4 point haduh mynta.