| Nongpoh: Na ki San tylli ki konstitwensi ha Ri Bhoi, ka Party UDP ka la pynieng saw ngut ki kyrtong ban iakhun ha kane ka Ilekshon MDC, kata ka long ha Nongpoh, Umsning, Mawhati bad Umroi Constituency, hynrei na kitei ki Saw tylli ki Konstitwensi kiba ka UDP ka la pynieng, ym shem la don wat tang uwei ruh u ban poi sha ka thong jong ka jingjop. Lah ruh ban kdew hangne, ba na kitei ki saw ngut ki Kyrtong ka UDP, arngut ki la dei lypa ki MDC bad kata kaba kynthup ia ka Kong Rona Khymdeit na Nongpoh bad u Bah Donkupar Sumer na Umsning. Katba kitei ki arngut pat ki kyrtong ki kynthup ia u Bah Kisborly Kharbani na Mawhati bad u Bah F.D Ramsiej na Umroi Konstitwensi. Na kitei ki Saw ngut ki kyrtong ka UDP, dei tang ka Kong Rona Khymdeit, ka kyrtong na Nongpoh, kaba la lah ban wan ha ka kyrdan ba-ar, kata hadien ba ka la ioh haduh 8445 vote, hynrei ka la shah pynliem noh ha u Bah Balajied Ranee, u kyrtong na ka Party Congress, uba la ioh haduh 11887 vote. Kaba sah nangta ka long ba kitei ki kyrtong ka UDP, ki la wan ha ka kyrdan balai bad ba saw, ha kaba u Bah Donkupar Sumer, MDC ka Umsning, u la wan ha ka kyrdan balai, u Bah Kisborly Kharbani, na Mawhati Konstitwensi u la ioh tang 3829 bad u la wan ha ka kyrdan kaba kaba Saw bad ka la long kumjuh ia u Bah Bah F.D Ramsiej uba la ioh tang 1563 vote bad uba la wan ha ka kyrdan ba Saw na Umroi. |
Phi don ban ong eiei?