Liem lut ka Dikkanchi, jop tang na konstitwensi u lok; tam U Conrad 1,92,214

Shillong, 19 Jymmang: U kyrtong ka NPP U Conrad K Sangma u la pynliem toin ia ka kyrton jong ka Congress ka Dikkanchi D Shira haduh jan 2 lak vote eiei ha ka jingpynbna mynta ka sngi ia ka jingiathep vote shiteng MP samoi na ka bynta ka Tura Lok Sabha.
U Conrad u la ioh 329497 vote, katba ka Dikkanchi ka ioh tang 137283 vote na ka 484127 vote.  U  Conrad u la jop da 192214 vote.  Da kane ka jingjop, u Conrad un mih bujli ha jaka jong u kpa jongu u Purno A Sangma.Mar ia jop, u Conrad u la leit ban ainguh ha lum jingtep u kpa jongu, u PA Sangma. Ki paidbah na kylleng ki jaka ki la ai khublei ia tuid ban leit ai khublei ia u Conrad halor kane ka jingjop don burom jongu.
Na baroh ki 24 konstitwensi, u Conrad u la khyrwait naphang ia ka kyrtong ka Congress lait noh tang ka Ampati kaba ka Dikkanchi ka jop salit ia u Conrad.
Ka NOTA ka ioh haduh 16597 vote.
Kaba pynjem daw ia ka Congress ka long ba baroh ki konstitwensi ba don ki MLA jongka, ki la shah pynliem lut ha u Conrad.
Na ka konstitwensi lajong ruh ka Mahen draganj, ka lok jong u Mukul Sangma, ka Dikkanchi ka la shah pynbam jem ha u Conrad uba la tam shi hajar vote eiei. Ka Dikkanchi ka ioh 11201 vote, u Conrad u ioh 12301.
Na Ampati, ka Dikkanchi ka ioh 11750 vote, katba u Conrad u ioh 9318 vote. Na konstitwensi u para jong u Mukul Sangma, u Zenith Sangma u la Conrad u la pynliem da 13709 ia ka Dikkanchi kaba ioh tang 8711 vote.
Ka jingjop kput jong u Conrad ka la pyni ba ki paidbah jong ka Garo Hills ki dang ieid bad kynmaw ia u Purno A Sangma uba khlad noh dang shen.
Ka Congress ka don 14 ngut ki MLA ha Garo Hills katba ka NPP ka don tang 2 ngut ki MLA, hynrei kumba ka paw na ka jingmih mynta, ka pyni ba ka bor ka NPP ka lah ban khie khlieh biang.
Ia u Conrad la kyrshan da ka BJP, ka UDP bad ka GNC nalor ki MDC ka NPP bad ar ngut ki MLA. Ka jingjop jong u Conrad, ka pyni ruh ba ka jingsngew lem ia u PA Sangma ka trei borbah ha ki paidbah ka Garo Hills,wat hapdeng ka jingshah kynthah na u Myntri Rangbah u Mukul Sangma, ka lok jongu bad ka Congress.