Shillong:Ha ka sien ialeh kaba nyngkong jong ka lympung Syed Mushtaq Ali Trophy, T20 tournament, ka kynhun ka jylla kaba iakhun pyrshah ia ka Hyderabad ka la rem noh da khyndai wicket ba la ialeh ha Jaipur.
Ha kawei pat ka lympung jong ki shynrang ka U-19 Vinoo Mankad Trophy ia kaba ka kynhun ka jylla ka iakynduh hi bad ka Hyderabad bad ka la shah rem da 246 run katba ha ka lympung jong ki kynthei ka Women’s U-19 One Day Trophy ba la ialeh ha Surat ka jylla ka la rem biang ha ka Maharashtra da 358 run
Ha Jaipur, ka Hyderabad kaba la jop ia ka toss ka la jied ban ap bad kawang bol shwa bad la iohi ba ka la lah weng shwa ia saw ngut ki nongtied tang da 19 run ha ki 44 over. Da ka jingwan rung madan noh u Lerry G Sangma u la lah ban kham pynkiew ia ka jingkamai jong ka kynhun da 46 run na ki 40 bol kaba kynthup ia hynniew tylli ki 4 bad kawei ka 6.
U Lerry u la ianeh paralok bad u Rajesh Bishnoi (14 run) da 40 run, nangta 30 run bad u Amiangshu Sen uba la ioh 27 na ki 25 bol. Ha kaba kut jong ki 20 over ka Meghalaya ka la lah ban kamai 119/6.
Ha ka jingbeh thong. ka Hyderabad ka la lah ban kot tang hapoh ka 13.2 over da ka jingduh tang uwei u wicket uba la lah ban pynkhyllem da u Chengkam Sangma da 1/31. Ka jingiakhun kaba bud jong ka Meghalaya kan long bad ka Mumbai ka ban ialeh mynta ka sngi.Ha Vijayawada, ka Hyderabad kaba la jop biang ia ka toss ka la jied ban tied shwa bad kamai haduh 389/7 ha ki 50 over ia kaba ka Meghalaya ka la lah ban jubab tang 143 bad liem lut baroh ki nongtied ha ki 47 over.
Uba la bol bha u dei u Angkit Tamang da 3/102 ha ki 10 over, bud sa u Cham Marbaniang da 2/51 ha ki 10 over, Bilgrak Sangma da 1/54 ha ki 8 over bad u Shavian Blah da 1/67 ha ki 8 over.
Ha ka jingbeh thong, u Shubham Rasaily u la lah ban tied shwa 31 run bud sa u Shavian da 37 na ki 45 bol, Rituraj Rabha 26 run, Avinash Rai 16 run. Hadien jong kine ki nongtied, ki san ngut ki nongtied kiba bud ki la lah ban kamai tang 23 run haduh ba kin khyllem lut ha shuwa ban kut ka over. Lashai ka sngi ka kynhun ka jylla kan ioh ban iakhun sa bad ka Delhi.
Ka jingiakhun hapdeng ki kynthei kaba ha Surat, ka kynhun ka jylla ka la hap ban khylliap noh ha ka jingiashim bynta ha ka lympung Women’s U-19 One Day Trophy, hadien ba ka la shah rem noh ha ka Maharashtra kaba la lah ban tied haduh 445/5 ha ki 50 over ha ka kylla step. Ka Fennysha Nongruum ka la lah ban shim wicket da 2/56 ha ki 8 over, Indariakor Kharwanniang da 1/16, Jayshree Singh 1/66 ha ki 6 over bad ka Kambesa A Sangma 1/74 ha ki 10 over.
Ha ka jingbeh thong ka Ankita Sharma ka la tied bun da 30 run bud sa ka Emisakani Warjri da 18 run bad dang iaineh hadien ba ka la mih madan ha ka pali kaba khyndai. Ka jingtied bol jong kane ka kynhun ka la kut noh tang ha hapoh ka over kaba 23 da kaba kamai tang 87 run bad liem lut baroh ki nongtied.
Phi don ban ong eiei?