Shillong 22 Risaw: Ka Hynniewtrep Integrated Territorial Organization (HITO) ha ka 22 tarik Risaw 2024, ka la leit tur sha ka ophis treikam ka Meghalaya State Pollution Control Board (MSPCB) ka ba don ha.. halor ban dawa ban pynlong biang da kawei ka public hearing haba ïadei bad ka jingthmu ban tei ïa ka kharkhana dewbilat ha Wahïajer, Narpuh, East Jaiñtia Hills District.
Ha kane ka jingwan tur ka HITO la sakhi ïa ka jing syrtap ki pulit ha khmat ka khyrdop katei ka ophis treikam ban lait na kano kano ka jingiakulmar.
Hashwa ban poi ha katei ka ophis Ka seng ka la pyrta ruh ia ka Slogan bad ha ka jingpoi ki nongïalam bad ki dkhot ka HITO ha katei ka jaka, la wanmih u migistrate nalor ki nongpynïaid katei ka board ha kaba ka la mih ka jingkren hapdeng ki ar kynhun ïa kaba ka la don ka jingmynjur ban ailad ïa ki dkhot ka HITO ban rung shapoh.
Ha ba iakren bad ki lad pathai khubor hadien ba ki la dep wan iakynduh ia u members secretary katei ka board u Dr. G. H. Chyrmang, MFS, u president ka seng HITO u bah Donbok Dkhar ula ong, ba ka seng ka wan ban ai da la jingthoh ban dawa pynlong biang da kawei ka public hearing ha ka ba iadei bad ka jingthmu shna ia ka karkhana dew bilat ha wahiajer.
U la ong ruh, ba ki aipor shitaiew ia ka MSPCB ban leh bad ban pynbeit biang ia kane ka kam bad lada kim pat leh eiei ha ka shitaiew kin sa shim sa da kiwei pat ki sienjam ban pynlong da ki jingiakhih bad ban leit ruh sha High Court.
U bah donbok u la phah ruh ka khubor sha ki nongshong shnong jong ka Wahiajer ba wat nym ia tieng namar ka seng kadon syndah bad phi bad wat ju biej ia ka spah ka phew namar u mynder hi u theh da ki spah ki phew ia ka ri Khasi jong ngi hynrei mangi pat ngi ia biej ia ka shispah arspah jong u mynder.
“Ki paradoh parasnam ha Wahiajer ki ba la rah dieng rah lathi ki ba khanglad ia ki nongshong shnong myn ha ka 18 tarik Risaw ban pynsngew ia ka jingpyrshah jongki to kynmaw ba lada ka San spah shihajar ka treikam ha ka FIR ka ba ka seng ka la phah sha ka DGP laiphew shah phin hap ban lut”, ong u bah donbok Dkhar.
Phi don ban ong eiei?