“Leit rejistar u bah Pynshngaiñ ia ka PDF sha ka ECI”: Shylla

Shillong, 12 Rymphang:
Ha ka jingthoh kaba jrong bha kaba u H.S Shylla MDC ka UDP na Nongkrem u la phah sha ki lad khubor, u la kdew ia kawei ka mat bad kata ka dei halor ka jingkylla seng sainpyrthei ka PDF sha ka PDF kata na ka People Democratic Forum (PDF) sha ka People Democratic Front (PDF), “Ka jingjia kaba khyllah tam ha ka sainpyrthei ba ka Forum kaba kynthup ia ki seng-sain-pyrthei kan pun kan kha ia kawei pat ka Seng-sain-pyrthei kaba kin hap ban ialeh pyrshah” ong u bah Shylla ha katei ka jingthoh.
Haba kdew kham shakhmat ia kiba bun ki jingkynnoh u bah Shylla u la ong biang “Ngi iohi ia ka jingbymkhuid jong i bah PN Syiem, CEM, iba la iaid sha khmat ban leit register noh ia ka seng riewlum bathymmai ka ban tip da ka kyrteng PEOPLE’S DEMOCRATIC FRONT (PDF) sha ka Election Commission of India, hynrei ia kane baroh la shu leh sop sop bad buhrieh na ka jingtip jong ki seng riewlum (UDP,HSPDP,KHNAM) kiba ia don lang ha ka People’s Democratic Forum (PDF) tang ban ioh pynneh ia ka shuki CEM”.
“La pun ia ka People’s Democratic Front ha ka jingbymkhuid bad yn kha ruh ka People’s Democratice Front ka bymkhuid. I bah P.N.Syiem i la dei ban risain shi syndon na ka jinglong MLA bad ia lait san shyieng war bad ka Congress sa sdang ban tei ia ka PDF ha ka jingkhuid jingsuba, hynrei mynta baroh ki jingleh jingkam ki long arsap bad buhrieh” ong biang katei ka jingthoh jong u bah H.S Shylla da kaba kdew ba ka jingkwah jong u bah Pynshngaiñ ban pynneh jubor ia ka shuki CEM ka dei tang ban suk ka leit ka wan Delhi bad ban pynlut da ki tyngka jong ka District Council bad ban pynlang ia ka Party Election Fund jong ka party thymmai ka PDF.
U la ong biang ba ka jingmih jong katei ka Party thymmai nalor ki Party ba la don lypa kan pynjot ia ka jaitbynriew, naba la pynmih ia ka da ka lynti ka bym khuid bym suba kaba u la ong ba ka long kaba shu par sor sor napoh kum ki bsein bad ki nianglartham. “Ki bym shlur ban mih da ka bakhuid bashai ba shynrang mynsiem kat ban seng ia ka Party ban iada ia ka Ri bad ka Jaidbynriew, kim long, kim lah bad kim dei ban kam ia lade ba ki dei ki nongialam bashisha hynrei tang ki nongshim-kabu” u la ong biang.
Haba kynthoh halor ka pisa jong ka Professional Tax u bah Shylla u la ong ban wanrah ia ka jingkhuid jingsuba bad ka jingpynioh ia ka hok ia kiba dei ban ioh la ka dei ia kiba halor ne ia u Secretary ba la shongthait Bah Weljone Syiemlieh, u bah P.N.Syiem, CEM u dei ban kynriah sharud bad ia ki EM baroh la ha kano kano ka rukom bad kumjuh ruh ia u bah Antonio War na ka kam Chairman jong ka KHCF ban ioh pynlong ia ka jingtohkit kaba khuid.