Leit pyrshah ki 2 seng ha ‘Meghalaya House’ Kolkata

Shillong: Ki 2 seng kiba kynthup ia ka a Joi Bangla Samsad bad Ka Jatiya Bangla Sammelan myn hynnin ka sngi ryngkat bad ki plakad ki la leit ban pyni ia ka jing pyrshah ha khyrdop ka ‘Meghalaya House’ kaba don ha ka jylla West Bengal, Kolkata halor ka jing shah thombor ki paid Bengali ha ka jylla Meghalaya.

U general secretary ka Jatiya Bangla Sammelan u Siddhabrata Das u la ong ba ka seng ka la kyntu ia u myntri rangbah ka jylla Meghalaya u Conrad K Sangma ban ai jing iada ia ki paid Bengali khamtam hadien ba ka seng kieng atiar ka HNLC ka la byrngem ban kput ia ki (Bengali) lada kim mih na Ichamati.

Na ka liang u Siddhabrata Das u la ong ba ka seng kan ap ia ka rai na u Conrad K Sangma, bad lada ka sorkar Meghalaya kam leh ei ei, na ka liang ka seng kan sdang biang ia ka jing iakhih.
Dang shen ka seng Amra Bangali ka la phah shithi sha u myntri rangbah ka jylla Meghalaya ban dawa ai jing iada ia ki paid Bengali kiba don hapoh ka jylla.