Nongpoh: Mynta ka sngi ki nongialam ha ryngkat ki dkhot ka KSU North Khasi Hills District, kiba don ha ki jaka bapher bapher ha Ri Bhoi, ki la leit ban pynieng Signboard ha kiba bun ki jaka khappud kiba don ha Ri Bhoi. Katei ka jingleit pynieng Signboard da ki KSU bad khatam eh sha kito ki shnong khappud, ka long ban pynpei ia ki shkor ba kyllut ka sorkar, namar ka jingshim sting halor ki mat jingdawa ka Jaidbynriew.
Ki dkhot ka KSU ha Ri Bhoi Sepngi, kaba la ialam da u Samla Receive Pator, ki la leit ban pynieng ia ki Signboard ha ki katto katne bynta jong ki shnong khappud ka Meghalaya-Assam, kiba don ha ka thain Balakhwa. Ki KSU 20Mer Circle, kaba la ialam da u Samla Khrawbok Sylliang, ha ryngkat ka jingdon u Bah Lambok Rymbai, General Secretary ka KSU ha Ri Bhoi, ki la pynieng ha surokbah NH-6 kaba don hajan ka Entry Point Umling.
Katba ki KSU Northern Border Area, kaba la ialam da u Samla Alexius Narleng, ki la pynieng ia ki Signboard ha kiba bun ki bynta jong ka surok Guwahati-Shillong bad kaba hap hapoh ka Raid Marwet, Ri Bhoi District. Katei ka jingleit pynieng Signboard da ki dkhot ka KSU ha kiba bun jaka ha Ri Bhoi bad khamtam eh ha kito ki shnong khappud, ka long kum shibynta ka jingiai bteng halor ki jingiakhih na ka bynta ban iai dawa pyntreikam noh ia ka ILP, ban pynbeit ia u pud u sam, ka jingdawa pynrung ia ka ktien Khasi ha ka khyrnit ba phra bad ban pyntreikam kloi noh ia ka MRSSA, kaba la pynlong Ain naduh u snem 2016.
Ka KSU North Khasi Hills District unit, ka buh shibun ki jingkylli na ka sorkar, kita kiba kynthup ba haduh lano ba ka sorkar India kan pyntreikam ia ka ILP ha Meghalaya? Bad sa katno snem yn pule yn bishar sah ia ka Resolution ILP?
Ka la buh jingkylli ruh ia ka sorkar MDA, ba shano la jah ka jingpyntrei ia ka MRSSA, kaba la dep ban pynlong Ain naduh u snem 2016.
Ki la pynpaw ruh ba ka ktien Khasi ka shonghok shong nongrim ban ruh ha ka khyrnit ba phra jong ka Constitution ka ri India, ha kaba ki la dawa ia ka sorkar ba ka dei ban shimkhia halor katei ka mat bad ka dei beit ban urlong.
Haba iadei bad u pud u sam, ka KSU ka la pynpaw ba shi inshi ruh ki jaka jong ka jaitbynriew, kim dei ban leit sha Assam bad kiba la dawa na ka sorkar ba ka dei ban pynkloi ha ka ban pynbeit ia u pud u sam, hynrei yn nai bynda ne ban leit lilam ia ka khyndew sha Assam.
Ka KSU, ka la phah ia ka kyrwoh ka baroh ki nongmihkhmat, ba ki dei ban peit bad pyndep la ka kamram na ka bynta ka bha ka miat jong ka Jaidbynriew, hynrei haba ki la long kum kita ki nongmihkhmat, kim dei ban shu sngap lane shu kmen tohhoh, pynban ki dei ban iasaid na bynta ban bha ka pateng ban wan.
Phi don ban ong eiei?