Leit pyndem 5 ngut ki longkmie ha Iingbishar, lait jamin noh Shah kem u nongialam HANM, ba thang kali

Shillong, 3 Risaw:
Ki 5 ngut ki longkmie kiba kynthup ia ka kong Agnes Kharshiing, President jong ka Civil Society Women Organisation (CSWO) kong Nebi Rapthap, President jong ka Khasi Women Welfare and Development Association (KWWADA), myn ta ka sngi ki la leit aiti noh ialade sha iingbishar. Kane ka jingleit aiti jong kine ki longkmie ka dei hadien ba ka kong I Majaw Magistrate ka la ujor pulit pyrshah ia ki da kaba kynnoh ba kine ki longkmie ki la donkti ha ka jingmih jingkulmar ha Motphran ha ka 26 tarik jong u bnai ba la dep.
Na ka liang jong kine ki longkmie kiba la leit aiti noh ialade sha Iingbishar mynta ka sngi, ki la ioh jamin noh syndon namar kine ki longkmie kiba la shah ujor ki la shah pynngat ha ka ain kaba lah ban lait jamin.
“Ngi leit aiti noh da lade ym ba ngi donkti halor kane ka jingkynnoh, hynrei ban lait na ka jingshah kem ha ki pulit bad ngi kwah ruh ban iaid katkum ka ain nalor ba ngi dei ki nongshong shnong kiba bud ryntih ia ka ain” la ong ka kong Agnes haba kren ha u nongaikhubor mynta ka sngi.
“Ngi kmen ba ki magistrate ki la ujor pulit pyrshah ia ngi, ngi kyrmen ba ki magistrate kin leh kumjuh kumba la ong da u Mukul Sangma ba baroh ngi long mar katjuh hakhmat ka ain ha kaba ki magistrate kin ujor pulit sa ia ki nongbamsap bad kumjuh ruh ia ki nongtah sia lih khnang ba ma ki ruh kin ngat ha ka ain” la bynrap ka kong Agnes.
Ha kawei pat ka khubor, la iathuh ba U Finance secretary ka Hynniewtrep Achik National Movement (HANM) West Khasi Hills unit u Bah Gabriel Sohlang u la shah kem halor ka jingkynnoh ba u donkti ban thang ia ki saw tylli ki ophis sorkar ha Nongstoin. U SP ka West Khasi Hills district u Bah Sylverstar Nongtnger u la ong ba ia u Bah Sohlang la kem da ki pulit ha ka janmiet na Nongstoin.
Katkum ka jingong une u heh pulit, u nongialam ka HANM u la don kti ban ther maw bad thang ia ka ophis jong u Executive Engineer PWD (Roads), ka ophis Meghalaya Khadi and Village Industries Board bad ka ophis Fishery ha Nongstoin ha ka 23 tarik Nailur ba la dep bad ka ophis jong ka Animals Husbandry & veterinary ha Nongstoin ha ka 1 tarik Risaw.
Ki pulit ki la kem kham mynshwa ia u Bah Arful K. Bani u president ka HANM West Khasi hills unit bad la pynngat ha lai tylli ki kam ba donkti ban ther maw.
Lah ban kdew ba ka HANM, ka la dawa weng noh ia u deputy commissioner ka West Khasi hills u Bah Sylvestar Kharlyngdoh ka la pynlong ia ka jingiakhih hadien ba ka sorkar kam weng ha ka por ba ka la buh.