Leit plie u MLA Umroi ia 6 tylli ki skim pynroi ha Bhoirymbong Lumdaitkhla

Nongpoh, 23 Risaw: U MLA ka Umroi Constituency u Bah Damanbait Lamare, MLA Umroi, mynta ka sngi u la leit ban plie paidbah ia ki skim pynroi kaba u la pynioh hapoh ka shnong Lumdaitkhla, Bhoirymbong, ha kaba tang ha katei ka sngi ba u la leit ban plie paidbah, ki skim kiba u la pynioh jingiarap hapoh katei ka shnong ki la jan kot klur tyngka.

Ha katei ka sngi ba la plie paidbah ia kitei ki skim pynroi sha ki shnong, la sakhi da ka jingdon u Bah Rangkynsai Kharbuki, MDC Umroi, nangta u Bah S.T Rympei, Rangbah Shnong Lumdaitkhla, Bah S. Pakyntien, Officer In-charge ka Khapmara PIC lem bad kiwei.

Ki skim pynroi, kiba la plie paidbah mynta ka sngi, ki kynthup ka ki building ICDS Centre, Anganwadi Centre ha kaba la tei ha ki Dong bapher bapher hapoh ka shnong Lumdaitkhla, hynrei kaba la pynkmen eh ha katei ka sngi, ka dei hadien ba ka Shnong Lumdaitkhla, ka la ïoh ban plie paidbah noh ia ka Ïing Dorbar Shnong, kaba la sdang ban tei naduh ka por ba long MLA da u Ma Ngaitlang Dhar.

Halor katei ka jingplie paidbah ia kitei ki skim pynroi, ki nongialam shnong, ki Rangbah bad ki longkmie, ki la ai jingiaroh eh ia u Damanbait Lamare, uba la shimkhia ban pynioh ia kitei ki skim pynroi hapoh ka shnong ka thaw bad kaba la ai jingmyntoi ia ki paidbah bad khamtam eh na bynta ki khynnah rit.