Leit noh synniang ka KSU sha ki lanot pluh iing ha Syadheh

Nongpoh: Ka Khasi Students’ Union Syad Unit, ka la leit ban noh synniang da ki tiar shet tiar tiew bad ki tin sop iing sha kawei ka longiing kaba ia kynduh ia ka apot pluh iing baba don ha shnong Syadheh, Ri Bhoi.

Katei ka jingpluh hapoh katei ka iing, ka la jia ha ka step 10 tarik Nailur, ha kaba ka ding ka la ioh ban bam duh noh ia baroh ki jingdon jingem kiba don hapoh katei ka iing bad kaba la wanrah ia ka jingduhnong kaba khraw ia ki trai jong katei ka iing.

Kumta ban pynpaw ia ka jingsngewlem halor katei ka jingjia ba sngewsih ia katei ka longiing, na ka liang ki nongialam bad dkhot ka KSU, ki la leit ban iarap sngewlem ia katei ka longiing.

Kiba la donlang ha kaba leit noh synniang sha katei ka longiing, ki kynthup ia u Samla Biangbor L. Paliar Vice-President Sengkmie, Samla P.Kylla President KSU Umsning Circle, Samla James Mawphniang Asst. General Secretary Sengkmie ha ryngkat ki dkhot ka North Khasi Hills District unit, ki dkhot na Umsning Circle bad ki nongialam Shnong Bah D.Mawphniang bad Bah S. Mawphniang.