Leit mih ka CSWO bad AIGU, pep kiwei ki sengbhalang Halor ka hajir jingiakhih ILP

Shillong, 8 Nailar:
Napdeng ki sengbha lang ba la iakhih ILP, tang ka Civil Society Women’s Organisation (CSWO) bad ka All India Garo Union (AIGU) kiba leit mih ha ka jingbishar halor ka jingtian bishar ia ka jingpynjot ba la mih na ka jingiakhih ia ka ILP ha kane ka sngi Thohdieng.
Haba kren sha ki nongthoh khubor hadien ba la dep wan mih na ka jingbishar, u nongiasaid ain ka sorkar u Satendra Kumar u la ong ba kane ka mukotduma kan iaid beit lada kiba shah khot hajir kim wan ruh ha ka Kashari. Ka jingbishar ban long biang, yn bishar ia ki kot ki sla, bad ki sakhi satar tangba ym pat buh ia ka sngi ban pynlong ia ka jingbishar. Ka Kashari Special Court la thaw da ka sorkar na ka bynta ban shim ia ka jingbishar ia ki mukotduma ba mih na ka jingiakhih ILP ki sengbhalang. Katkum ka jingkhein ka sorkar, ka jingduh ha ka por ba iakhih ILP ki sengbhalang ka la kot sha ka T. 31 klur. Baroh ki don haduh 86 tylli ki mukotduma ba la rejister pyrshah ia ki sengbhalang ba pynlong ia ka jingiakhih ILP bad 73 tylli la pynngat ha ki kyndon jong ka ain.